Tshiji katshikulenduishi
“PUEKESHA kuoku tshilunji!” “Talala!” “Anji tukija kuoku!” Ukadiku mumvue mêyi aa anyi? Imue misangu utu udiambilawu bua kutalaja dilubakana diudi nadi. Bua kukanda tshiji, bamue bantu batu baya kuendakana. Eyi mmishindu mipepele bua kutuyisha tshiji ne kulama malanda mimpe ne bakuabu.
Kadi mu bidimu bidi panshi ebi, mibelu idi kayiyi yumvuangana ya kudi bamanyi bapiluke pa mushindu wa kukanda anyi kumbusha tshiji mmishiye bantu ba bungi kabayi bamanye tshia kuenza to. Tshilejilu, bamue bamanyi bapiluke ba ngikadilu ya muntu mbafike ku diamba ne: “bikalabi se: udi idiumvua bimpe” paudi uleja tshiji, enza nanku. Bakuabu badi badimuija ne: kuikala ne biji dîba dionso “kudi kumanyisha lufu lua kumpala kua dîba kupita malu makuabu atu akebesha njiwu bu mudi dinua makanya, disama dia luendu lua mashi, ne dia mafuta mapite bungi mu mubidi.” Dîyi dia Nzambi didi diamba patoke ne: ‘Lekela kufua tshiji, upidie kuikala ne njiya. Kunyingabadi; bualu ebu budi mua kukuenzeja anu bualu bubi.’ (Musambu 37:8) Bua tshinyi Bible udi ufila mubelu eu musunguluke?
Dibenga kukanda tshiji ditu difikisha ku bienzedi bibi. Ke muakenzekabi ku ntuadijilu menemene wa malu a bantu. Tudi tubala ne: “Kana wakadi ne tshiji, wakabungama.” Tshiji etshi tshiakamufikisha ku tshinyi? Tshiji tshiakamukuata ne kumukokesha, kufikatshi ne ku dipapisha mutshima wende ku mubelu wakamupesha Yehowa, umulomba bua kuenza malu mimpe. Dibenga kukanda tshiji diakafikisha Kana ku mpekatu munene, kumufikisha ku dishipa muanabu.—Genese 4:3-8.
Bia muomumue, Shaula mukalenge wa kumpala wa Isalele, wakakuatshika tshiji pakumvuaye bantu batumbisha Davidi. ‘Bakaji bakimba, bambilangana ne: Shaula wakashipa binunu bia bantu, Davidi wakashipa binunu makumi bia bantu. Shaula wakadi ne tshiji tshikole; bualu ebu buakanyingalaja mutshima wende.’ Nenku tshiji tshiakakokesha lungenyi lua Shaula ne kumusakatshi bua kukeba bua kushipa Davidi misangu ne misangu. Nansha muvua Davidi mumulombe bua kupungabu nende, Shaula kavua musue kusomba mu ditalala ne kupunga nende to. Ndekelu wa bionso Yehowa wakamubenga.—1 Samuele 18:6-11; 19:9, 10; 24:1-21; Nsumuinu 6:34, 35.
Padi muntu kayi ukanda tshiji, mu mishindu yonso neafike ku diamba anyi ku dienza malu anyingalaja bakuabu. (Nsumuinu 29:22) Kana ne Shaula bakafiika munda bualu bavua ne mukawu ne lubabu. Kadi tshiji tshidi mua kujukila ku malu kabukabu. Dijana muntu kakuyi kabingila, bipendu, dipanga kumvuangana anyi kansungasunga bidi mua kuikala kapia kadi katemesha tshiji.
Tshilejilu tshia Kana ne Shaula tshidi tshileja ne: buobu bonso bavua bapange tshintu kampanda tshinene. Bidi bimueneka ne: mulambu wa Kana kauvua muenzeja kudi ditabuja to. (Ebelu 11:4) Dibenga kutumikila mêyi majalame a Yehowa ne malu akaluaye kuenza pashishe bua kudibingisha biakafikisha Shaula ku dijimija dianyisha dia Nzambi ne spiritu wende. Bushuwa, Kana ne Shaula bakanyanga malanda abu ne Yehowa.
Tangila mudi ngikadilu eyi mishilangane ne ya Davidi, eu uvua ne kabingila ka kufiika munda pa kumona muvua Shaula umukengesha. Davidi wakadikanda. Bua tshinyi? Wakamba ne: ‘Yehowa ampidishe tshienzedi mukalenge wanyi, wakela Yehowa manyi pa mutu, bualu ebu.’ Davidi uvua muvuluke bimpe malanda avuaye nawu ne Yehowa, ne avua ne buenzeji pa bivuaye mua kuenzela Shaula. Ne budipuekeshi buonso wakashiya malu au mu bianza bia Yehowa.—1 Samuele 24:6, 15.
Bushuwa, dibenga kukanda tshiji ditu dienzeja malu manene. Mupostolo Paulo wakadimuija ne: ‘Nuikale ne tshiji kadi kanuenji bualu bubi.’ (Efeso 4:26) Nansha mutudi mua kufiika munda ne kafiikila kalelela, njiwu idiku nya se: tshiji tshidi mua kulua dibue dia tshilenduishi kutudi. Ke bua tshinyi tuetu bonso tudi ne bua kuluangana bua kukanda tshiji. Mmunyi mutudi mua kutshikanda?
Mushindu wa kumpala ng’wa kushemeja malanda ne Yehowa. Udi ukukankamija bua kumunzuluila mutshima ne lungenyi luebe. Umukuatshile yebe yonso idi mikutonde, ne umulombe mutshima wa bupole bua wewe kumona mua kukanda tshiji. (Nsumuinu 14:30) Ikala mushindike ne: ‘mêsu a Mukalenge adi kudi bakane, ne matshi ende adi buashi ku milombu yabu.’—1 Petelo 3:12.
Disambila didi mua kukushintulula ne kukuludika. Mmunyi? Didi mua kuikala ne buenzeji bukole mu malu audi wenzela bakuabu. Uvuluke mushindu udi Yehowa mukuenzele malu. Bu mudi Mifundu yamba, Yehowa “kena mutuenzele bu mudi mibi yetu nansha.” (Musambu 103:10) Dibuikidilangana didi ne mushinga mukole bua ‘Satana kikadi ne muaba wa kutupitshila budimu.’ (2 Kolinto 2:10, 11) Kabidi, disambila didi diunzulula mutshima webe bua kuitaba buludiki bua spiritu munsantu budi mua kushimbula bikadilu bibi bia mu nsombelu. Ne musangelu Yehowa utu ufila ‘ditalala didi ditambe dijingulula dionso,’ didi mua kukumbusha ku buenzeji bukole bua tshiji.—Filipoi 4:7.
Kadi pa kumbusha disambila, tudi kabidi ne bua kukonkonona Mifundu pa tshibidilu bua tuetu ‘kujingulula mudi disua dia Mukalenge.’ (Efeso 5:17; Yakobo 3:17) Biwikala ne lutatu bua kukanda tshiji, ditatshisha bua kumanya meji a Yehowa pa muanda eu. Konkonona Mifundu idi yakula nangananga bua mushindu wa kukanda tshiji.
Mupostolo Paulo udi utuvuluija bualu bua mushinga ebu ne: ‘Tuenzelayi bantu bonso bimpe, kadi tutambe kuenzela bena dîku dia bena kuitabuja bimpe.’ (Galatia 6:10) Ngenyi ne bienzedi biebe bishindamene pa malu mimpe a kuenzela bakuabu. Malu aa mimpe ne malenga neakankamije diditeka pa muaba wa bakuabu ne dieyemenangana, kabidi neakepeshe dipanga kumvuangana didi kakuyi lutatu mua kukufikisha ku tshiji.
Mufundi wa misambu wakamba ne: ‘Ujadike biendedi bianyi mu dîyi diebe, kuitabuji bua dipambuka dia ku buakane dinkokeshe. Badi bananga mikenji yebe badi ne ditalala dinene; kakuena tshidi mua kubalenduisha’ to. (Musambu 119:133, 165) Bidi mua kuikala nanku kuudi wewe pebe.
[Kazubu/Tshimfuanyi mu dibeji 9]
MALU A KUENZA BUA KUKANDA TSHIJI
◻ Sambila Yehowa.—Musambu 145:18.
◻ Konkonona Mifundu dituku dionso.—Musambu 119:133, 165.
◻ Difila mu dienza malu adi mimpe.—Galatia 6:9, 10.