“Biapanga luepu kutua”

VITA ya bungi ikadi mienzeke bua luepu. Bavua benza nalu mudimu bua kushintakajangana bintu. Mu ditunga dia Chine wa kale luvua ne mushinga mulondele wa or. Eyowa, batu bangata luepu katshia ku kale bu tshintu tshia mushinga mukole. Too ne lelu, batu bamba mudi luepu luondapa bantu ne lushipa tuishi, ne mu buloba bujima batu balengeja nalu biakudia ne babilama nalu kabidi.

Pa kutangila ngikadilu mimpe ya luepu ne mishindu idibu bakuata nalu mudimu, kabiena bikemesha padi Bible muakule bua luepu mu tshimfuanyi. Tshilejilu, Mikenji ya Mose ivua ilomba ne: tshintu tshionso tshivuabu balambula Yehowa pa tshioshelu, tshikale tshiela luepu. (Lewitiki 2:13) Kabavua benza nanku bua kushemeja milambu to, kadi misangu mikuabu mbualu luepu luvua tshimfuanyi tshia dibenga kunyanguka anyi kubola.

Mu Muyuki wende wa pa Mukuna muende lumu, Yezu Kristo wakambila balongi bende ne: “Nuenu ke badi luepu lua ba pa buloba.” (Matayo 5:13, MML) Yezu uvua usua kuamba mu mêyi aa ne: diyisha bantu bakuabu bua Bukalenge bua Nzambi divua mua kuikala ne bukole budi bulama ne bupandisha mioyo ya bavua babateleja. Bushuwa, aba bonso bavua batumikila miaku ya Yezu bavua mua kukubibua ku dinyanguka dia bikadilu ne dia mu nyuma mu miaba ivuabu basombele ne basadila.​—1 Petelo 4:1-3.

Kadi Yezu wakatungunuka ne kufila mubelu ne: “Kadi biapanga luepu kutua . . . kaluena ne dikuatshisha kabidi; badi anu mua kuluimansha ne bantu badi baludiata.” Wela nseka pa miaku eyi, mumanyi mupiluke wa malu a Bible Albert Barnes wakamba ne: luepu luvua Yezu ne bapostolo bende bamanye “kaluvua anu luepu pa luolu to, luvua lusambakaja ne buloba ne bintu biangatshila ku mitshi.” Nunku pavua luepu kalutshiyi lutue, “tshivua mua kushala tshivua buloba bua bungi.” Barnes wakamba ne, “buloba abu kabuvua ne mushinga, buvua anu . . . bua kuela mu njila, amu bu mutubu bela nsakabu.”

Bua kuangata mubelu eu ne mushinga, bena Kristo badi ne tshia kudimuka bua kabalekedi diyisha dia patoke anyi kupona mu bienzedi bibi. Tshianana, nebanyanguke mu nyuma ne kulua kabayi ne mushinga, amu bu ‘luepu ludi lupange kutua.’