Udi muvuluke anyi?

Nimero ya Tshibumba tshia Nsentedi ya matuku mashale aa mmikuambuluisheku anyi? Nanku anji teta lungenyi luebe ne nkonko idi ilonda eyi:

◻ Nnkonko kayi ibidi idi miambuluishe bena Kristo ba bungi bua kudiangatshila dipangadika padibu ne bua kusungula mudimu?

Lukonko lunene lua kumpala ndua se: Bible mmubenge mudimu wa ku mubidi eu anyi? Lukonko luibidi ndua se: Dienza mudimu eu didi mua kufikisha muntu ku dibuelakana mu tshilele tshikandika anyi?​—15/4, dibeji 28.

◻ Mmu mushindu kayi muvua ‘bifukibua bitekibue kunyima kua malu a patupu’? (Lomo 8:20)

‘Tuakatekibua kunyima kua malu a patupu’ bua bienzedi bia baledi betu ba ntuadijilu, Adama ne Eva. Kabivua ku ‘didisunguila [dietu]’ peshi bua disungula dia muntu nkayende nansha. Tuakapiana nsombelu eu. Bua luse luende, Yehowa wakitabila Adama ne Eva bua balele bana, nansha muvuabu mpindieu mua kubasambulujila anu dipanga bupuangane, mpekatu ne lufu. Lufu luakafika kudi bantu bonso, nenku mu ngumvuilu au ke mudi Nzambi ‘muteke [bifukibua] kunyima kua malu a patupu.’​—1/5, dibeji 5.

◻ Bua tshinyi mbia meji bua kuamba ne: “tshintu tshibipe” ‘netshimane mu muaba munsantu’ mu matuku atshilualua? (Matayo 24:15, NW)

Mu tshilejilu tshia kale, ‘tshintu tshibipe tshimane mu muaba munsantu’ tshivua tshisuikakaja ku mvita yakelabu Yelushalema ne ntempelo wende kudi bena Lomo balombola kudi Jenerale Gallus mu 66 B.B. Mvita ya tshikondo tshietu etshi idi mifuanangane nayi itshidi kumpala, mmumue ne: dibudika dia dikenga dinene. Nenku “tshintu tshibipe tshidi tshikebesha kabutu” tshidi ne bua kuimana mu muaba munsantu mu matuku adi kumpala.​—1/5, dibeji 16 ne 17.

◻ Mmunyi mudi tatu ne mamu batu benza mudimu mua kupeta dîba dia kusomba ne bana babu balela?

Mamu utu wenza mudimu udi udiumvua mutshioke kunyima kua mudimu udi mua kuambila bana bende bua kulamba biakudia pamue nende. Tatu udi ne midimu mivule ya kuenza ku ndekelu kua lumingu udi mua kuenza imue midimu eyi ne bana bende.​—15/5, dibeji 6.

◻ Ntshinyi tshidi aba ‘badi bendela mu njila wa Yehowa’ ne bua kuenza? (Yelemiya 7:23)

Kuendela mu njila wa Yehowa kudi kulomba bulamatshi​—dipangadika dia kumuenzela yeye nkayende mudimu. Kudi kulomba dieyemena​—ditabuja dikole dia se: malaya a Yehowa nga kueyemena ne neakumbane. Kuendela mu njila wa Yehowa kudi kulomba butumike​—kulonda mikenji yende kakuyi disesuka ne kulama mêyi-makulu ende matumbuke. (Musambu 11:7)​—15/5, dibeji 14.

◻ Mmidimu kayi minene inayi idi “mapa mikale bantu” mua kukumbaja? (Efeso 4:8, NW)

Badi mua kutululamija ne bulenga buonso, kutuibaka ne dinanga, kulama buobumue buetu mu tshisumbu ne kutukuba ne dikima. (Efeso 4:12-14)​—1/6, dibeji 14.

◻ Ntshinyi tshitudi mua kulongela ku bulunda bua Paulo ne bantu batue ku lukama batela mu Bienzedi ne mu mikanda ivuaye mufunde?

Misangu yonso tudi ne bua kuenza mudimu pamue ne bulongolodi bua Nzambi, ne tshisumbu tshia muaba utudi ne bena kuitabuja netu. Tudi dijinga ne diambuluisha diabu, dikuatshisha diabu ne busambi buabu mu bikondo bimpe ne mu bikondo bibi.​—1/6, dibeji 31.

◻ Nngelelu wa meji kayi wa bitupa bisatu uudi mua kuambuluisha nende bantu bakuabu bua kufika ku diela meji bua Mufuki?

Mushindu udi bintu biakaja bimpe menemene, ntuadijilu wa muoyo pa buloba ne buongo bua muntu budi bua pa buabu ne malu kabukabu adibu mua kuenza.​—15/6, dibeji 18.

◻ Bua tshinyi kujingulula tshidi dîna disunguluke dia Mufuki diumvuija kudi ne mushinga wa bungi?

Dîna dia Nzambi didi diumvuija ne: “Udi uvuija,” ne didi dileja ne: udi ulongolola malu ne uakumbaja. Tuetu bamanye dîna diende ne bikale nadi mukana, tudi mua kujingulula bimpe menemene ne: udi ukumbaja malaya ne dilongolola diende.​—15/6, dibeji 21.

◻ Ntshinyi tshinudi mua kuenza bua kubueja bana mu dilonga dia Bible dia mu dîku?

Padiku mushindu, nuenze bua muana yonso ikale ne wende Bible ne mukanda unudi nulonga. Nudi mua kulomba muana ukadi nsonga bua umvuije tshimfuanyi tshidi mu tshiena-bualu tshinudi nulonga, ne nudi mua kudianjila kupesha muana mutekete mvese kampanda wa kubala. Nudi mua kulomba muana ukadi mutantamane bua kuleja mushindu wa kutumikila malu anudi nulonga.​—1/7, dibeji 15.

◻ Mbimue bipatshila kayi bidi bena dîku mua kuikala nabi padibu balongolola bisangilu bia tshisumbu?

(1) Muntu yonso udi mu dîku ikale udilongolola bua kumona mua kuandamuna mu bisangilu; (2) muntu yonso adienzeje bua kuandamuna mu ende mêyi; (3) ele mvese mu mandamuna ende ne (4) akonkonone malu adiye ulonga ne tshipatshila tshia kuatumikila.​—1/7, dibeji 20.

◻ Ntshinyi tshidi nsapi wa dibaka dimpe?

Bua kunzulula ne kupeta masanka mavule a mu dibaka dimpe, bualu bumue bua mushinga mukole ndiyukidilangana dilenga. Didi diumvuija dishintakaja dia ngenyi ne dia bidi muntu umvua. Ne diyukidilangana dilenga didi dilomba malu adi akolesha, akankamija, adi mimpe, adi makanyine kalumbandi ne adi asamba bakuabu. (Efeso 4:29-32; Filipoi 4:8)​—15/7, dibeji dia 21.

◻ ‘Njila wa Yehowa’ ntshinyi? (Musambu 25:8, 9, 12)

Njila au nnjila wa dinanga. Mmushindamene pa dienza tshidi tshiakane bilondeshile mêyi-makulu a Nzambi. Bible udi ubikila dileja dinanga edi diashila pa mêyi-maludiki ne: ‘njila mutambe yonso.’ (1 Kolinto 12:31)​—1/8, dibeji 12.