“Bakatshina Nzambi”

PAVUA bena Isalele mu bupika mu Ejipitu, Shifela ne Pua baleleshi bena Ebelu bavua mu njiwu. Bu muvuaye ne tshipatshila tshia kukepesha divulangana dia benyi, Palô wakambila bantu bakaji aba ne: “Diba dinuikala nulelesha bakaji ba bena Hebreyi, . . . padibo balela muana wa balume, numushipe.”​—Ekesode 1:15, 16, MMM.

Shifela ne Pua “bakatshina Nzambi,” nenku bakapeta dikima ne ‘kabakenza muakabambila mukalenge wa Ejipitu.’ Bakalekela bana ba balume ne muoyo, nansha muvua muanda eu wa dikima mua kuikala muteke muoyo wabu mu njiwu. Yehowa “wakenzela baleleshi bimpe,” ne kubabenesha bualu bavua bashiye bana ne muoyo.​—Ekesode 1:17-21.

Muyuki eu udi uleja ne: Yehowa utu wanyisha bantu badi bamusadila. Uvua mua kuikala muangate tshivua Shifela ne Pua benze, nansha muvuabu batshienze ne dikima, bu bualu buenza patupu bua diakalenga dia bantu. Bua kuamba bimpe, mukaji yonso wa meji mimpe kêna mua kushipa bana to! Kakuyi mpata, Yehowa wakavuluka ne: bua ditshina bantu, bamue mbafike ku dienza malu mabi matambe. Uvua mumanye ne: tshivua tshisake baleleshi aba katshivua anu muoyo mulenga to, kadi bavua kabidi basaka kudi ditshina ne lulamatu luabu kudi Nzambi.

Tuikalayi ne dianyisha bua mutudi tusadila Nzambi udi umona malu atudi tuenza ne lulamatu! Bushuwa, pamu’apa katutu banji kupeta diteta bu divua Shifela ne Pua bapete to. Kadi patudi tulamata ku malu makane​—mu kalasa, ku mudimu peshi mu nsombelu mukuabu yonso—​Yehowa kêna ulengulula lulamatu ne dinanga dietu nansha. Kadi udi ulua “mufutshi wa badi bamukeba.” (Ebelu 11:6) Eyowa, ‘Nzambi kêna upanga buakane bua kupuaye muoyo wa mudimu wenu ne wa dinanga dinuakaleja bua dîna diende, panuakakuatshila bansanto mudimu ne panutshidi nubakuatshilawu.’​—Ebelu 6:10.