Mushindu wa kukolesha bana bilenga

DIKOLESHA bana lelu, nangananga bakadi ne bidimu dikumi ne pamutu, ndutatu lukole ludi nalu baledi. Tshikandakanda kampanda tshia mu tshimenga tshia Montréal, mu ditunga dia Canada, tshidi tshileja ne: dinua maluvu makole ne diamba ndilue “tshibidilu tshia bansonga.” Tshidi tshishindika tshiamba ne: baledi badi ne “bujitu bua kuikala batabale bua mashintuluka onso adi amueneka mu bikadilu bia bana babu balela.”​—The Gazette.

Mbimanyinu kayi bidi baledi ne bua kukeba bidi bileja ntatu ya ku bunsonga eyi? Pa kumona bimanyinu bia ku mubidi, mu lungenyi ne bia mu disomba ne banga bantu, bena mu Iniversite wa mu Amerike badi balonga malu a bikadilu bia bansonga bakatela bintu bu mudi: dipungi dia munanunanu, dishintuluka dia bumuntu ne tshilunji, ditamba kudikangila mu nzubu mutantshi mule, tshibidilu tshia kutandangana ne dienza malu adi mikenji ibenga.

Mmunyi mudi baledi mua kukuba bana babu balela ku malu aa a njiwu ne kubakuba ku bipeta biawu bibi? Munganga Jeffrey Derevensky, wa mu Iniversite wa McGill, udi wamba ne: diyukila bimpe ne bana ne dibakankamija bua kumanya mua kunemeka bantu didi mua kukepesha ntatu idi mua kumueneka kunyima. Tshikandakanda etshi tshitukadi batela tshidi tshiamba kabidi ne: nansha mudi bansonga bajinga bua kuikala ne budikadidi bua bungi, batu anu dijinga ne “mibelu, dikuatshisha, tshilejilu ne dinanga bia kudi baledi babu.” Malu aa ndiambulula patupu dia lusumuinu lua mu Bible ludi luamba ne: ‘Yisha muana mu njila udiye ne bua kuendela; nunku pakolaye, kêna umukamu.’ (Nsumuinu 22:6) Nzambi udi ubela baledi bua kuikalabu bilejilu, balunda, bantu badi bamanye mua kuyukidishangana ne kulongesha.​—Dutelonome 6:6, 7.