“Mmunyi mutudi mua kutabuluja bena mu parwase yetu?”

LUKONKO elu, lujula matuku mashale aa mu tshikandakanda tshia bena Katolike tshia mu Mfualansa tshia: Famille Chrétienne (Dîku dia bena Kristo), kaluena lukemesha bantu ba bungi to. Nansha Kardinale Hume wa mu ditunga dia Angleterre wakabikila bena mu parwase ne: “bantu ba mpolondo balale tulu.” Badi baleja ne: bua kubenga kubungila mu nyuma, mbimpe kusangisha mu tusumbu mu tusumbu bena mu parwase bua kuikalabu bayisha bakuabu. Nsaserdose kampanda wa mu ditunga dia Italie udi ubikila mudimu eu ne: “Kuyisha bantu buludiludi ne ngenzelu mipiamipia.” Nansha muvua pape mufile ngenyi eyi matuku mashale aa, bantu bonso ki mbamone mushinga wa kumanyisha ditabuja diabu kudi bantu bakuabu to.

Pavua Pigi Perini, kiré wa mu tshimenga tshia Milan, mulue mu Afrike matuku mashale aa, mansere mukuabu kumuambilaye ne: “Nkadi ne bidimu 40 muaba eu, kadi tshitu ntela dîna dia Yezu bua kubenga kunyanga bilele bia bena mu Afrike.” Pigi Perini udi wamba ne: “Katutu tuakula kabidi bua Yezu to, katutu kabidi tuambilangana malu a Yezu to, katutu tuyisha kabidi evanjeliyo nansha!” Pabi, bua bantu bakuabu ba bungi, kuyisha mbualu bua mushinga butubu benza pa tshibidilu ne mene mmushindu wa kushala batabale mu nyuma. Pigi Perini udi wamba kabidi ne: “Paudi usambakena ne bantu babidi bakula bua Kristo mu tshisalu, anyi bakuate Bible ku bianza, neudiambile mundamunda ne: Aba m’Bantemu ba Yehowa!”

Bantu miliyo ya bungi mbanange bua kuyukila Dîyi dia Nzambi ne Bantemu ba Yehowa. Kakuyi mpata, Bantemu mbalongolole bua kuyukila nebe malu a mu Bible muaba uudi musombele. Anu bu mu lukama lua bidimu lua kumpala, bena Kristo aba ba tshisumi badi bakankamijangana bua kumanyisha bantu bakuabu ditabuja diabu. Miaba idibu benza bisangilu biabu (mibikila ne: Nzubu ya Bukalenge), neusanganemu musangelu ne bulunda. Bua tshinyi kuenaku mua kubuela mu tshimue tshia ku bisangilu bilongolola kudi Bantemu ba Yehowa ne kumona mushindu uudi mua kubenga kubungila mu nyuma?