Padi ‘mpepele itutatshisha’

Evanjeliyo wa Mâko udi wakula bua bualu buakenzekela bayidi ba Yezu umue musangu pavuabu baluangana bua kusabuka Dijiba dia Galela ne buatu. Udi wamba ne: bavua “batata bua kuita buatu, bualu lupepele luvua lubatatshisha.” Mpindieu, pavuaye ku mukuna, Yezu kumona muvuabu batata, ke kuenzaye tshishima pa kuendela pa mâyi bua kufika kuvuabu. Pakabuelaye mu buatu muvuabo, lupepele kutuya.​—Mâko 6:48-51, MMM.

Mâko udi ulonda ne: umue musangu kumpala, ‘tshipepele tshikole tshiakatuta.’ Yezu umvua nanku “kukanyinaye tshipepele . . . tshipepele kukoseka, bionso kubutama.”​—Mâko 4:37-39, MMM.

Tuetu petu tudi mua kulongela malu a bungi ku bishima ebi nansha mutudi katuyi lelu ne mushindu wa tuetu kubimona. Bu mutudi bena mpekatu ne bikale mu bikondo bikole, mpepele mibi neikale anu mua kututatshisha. (2 Timote 3:1-5) Imue misangu ntatu idi ifumina ku mateta idi mua kumueneka bu tshipepele tshikole. Kadi kudi mushindu wa kupeta disulakana! Yezu udi wamba ne: “Vuayi kundi meme, nuenu bonso badi bakenga, bazengele ne bujitu, meme nennukankamike.”​—Matayo 11:28, MMM.

Kadi tudi mua kushala ne ditalala dia bungi mu mutshima padi ‘mpepele itutatshisha.’ Mushindu kayi? Pa kueyemena malu adi Yehowa Nzambi mulaye, malu akumbana nansha bia munyi.​—Tangila Yeshaya 55:9-11; Filipoi 4:5-7.