Bantu nnyama ya meji mabandile anyi?
“Kudiku dishilangana patudi tuitaba ne: muoyo udi ne ntuadijilu anyi?”
Nsongakaji wa bidimu 16 wa mu ditunga dia Brésil wakela lukonko elu ku mbangilu kua muyuki wende uvua ne tshiena-bualu ne: “Bantu nnyama ya meji mabandile anyi?” Mulongeshi wabu uvua mumuambile bua kuandamuna lukonko elu kumpala kua kalasa kajima, kunyima kua mulongeshi eu mumane kupeta nimero wa Réveillez-vous! wa dia 22 Kabalashipu 1998, uvua wakula bua muanda eu.
Nsongakaji eu (Ntemu wa Yehowa) wakaleja muvua dilongesha dia bidimenene dinyangakaje malu, dilongesha didibu bajadika ne malu a nyama anyi mitshi mikese idibu basungule. Tshilejilu, bantu ba bungi badi bela meji ne: dilongesha dia bidimenene diakafikisha bamue ku diangata mvita bu mushindu mulongolola katshia ku tshifukilu udi nawu muntu bua kushala ne muoyo, yakunzuluila bukokeshi bua ba-Fasciste ne bua bena Nazi njila.
Mulongi eu wakaleja ne: kudi dishilangana dinene pankatshi pa bantu ne nyama. Wakamba ne: “Anu bantu ke badi mua kunanga malu a mu nyuma. Anu bantu ke badi bakeba kumanya tshidi muoyo ne kudibu baya nawu. Anu bantu ke badi banyingalala bua lufu, badi bakeba kumanya ntuadijilu wabu ne badi ne dijinga dia kushala ne muoyo kashidi. Bidi ne mushinga wa bungi bua tuetu kusomba ne kulonga ndambu wa malu adi atangila ntuadijilu wetu!”
Mulongeshi wakanyisha bikole muyuki eu mulenga. Wakamba ne: nsongakaji eu uvua muwenze bimpe bualu utu musue kubala. Nsongakaji eu mmumanyike mu tshilongelu tshiabu bu mubadi wa dilambu wa mikanda idi yumvuija Bible bu mudi Réveillez-vous! ne Tshibumba tshia Nsentedi.
Bantemu ba Yehowa badi banyingalala bua mushindu udi dilongesha dia bidimenene dinyanga mitshima ne ngenyi ya bansonga. Bua nanku tshisumbu tshia nsongakaji eu tshiakakankamija bansonga Bantemu bua kuabanyina balongeshi ne balongi babu nimero wa Réveillez-vous! wa dia 22 Kabalashipu 1998. Bakabanya bibejibeji bitue ku 230 mu bilongelu bishilangane bia mu tshimenga atshi. Mulombodi wa Tshibambalu tshia malu a Mamanya wa mu tshilongelu kampanda wakenzeja abonema wa tshibejibeji tshia Réveillez-vous!
Eyowa, malu atudi tuitaba bua mushindu wakatuadija muoyo adi aleja dishilangana! Nsongakaji eu ne balunda bende mbaleje ne: kuitabuja Mufuki nkuleje dishilangana dilelela mu nsombelu wabu.