Wakabapingaja mpeta ku minu

“TANGILA ku minu yanyi eku. Udi mumoneku dishilangana anyi?” Muntu mulume kampanda wakaleja muntu mukaji mukuabu (Ntemu wa Yehowa) tshianza. Pakatangila muntu mukaji eu, wakamona ne: mpeta wa dibaka wa muntu au katshivuaku to. Muntu au wakamumvuija ne: yeye ne mukajende kabatshivua kabidi bumvuangana to, mpindieu buobu kupangadija bua kushipa dibaka. Ntemu eu kumuandamuna ne: “Too!” E kusakidila ne: “Angata mukanda eu, uubale. Neunuambuluishe mu dibaka dienu.” Kumupeshaye mukanda wa Dimanya didi difikisha ku muoyo wa kashidi.a

Pakapita matuku ndambu, muntu au e kupingana ne disanka bua kumonangana ne Ntemu eu. Wakamuleja tshianza. Musangu eu uvua muvuale mpeta wende wa dibaka. Wakambila Ntemu ne: yeye ne mukajende bavua babale mukanda wa Dimanya, nanku bavua mpindieu ne disanka dia bungi. Bushuwa, mukanda eu uvua mupingaje mpete ku minu yabu.

Mibelu ya mu Bible idi mua kuambuluisha mulume ne mukajende bua kunanganganabu ne muoyo mujima. Bidi mua kuenzeka nanku bualu mufundishi wa Bible m’Mufuki wetu. Mufuki mene udi wamba ne: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bualu bua kuendelamu.’​—Yeshaya 48:17.

[Mêyi adi kuinshi]