Tshidiye katshiyi umona katshia umbuka mu New York

MÊYI atudi tumona aa mmafunda ku umue wa ku nzubu itu Société Watchtower ku Brooklyn upatuila mikanda mu New York katshia mu bidimu bia 1950. Mêyi aa atu avuluija bena ngendu kabukabu ne bantu bakuabu batu bapitshila muaba eu bua kuikalabu babala Bible dituku dionso. Mukanda udi ulonda eu (wa kudi nsongakaji kampanda Ntemu wa Yehowa) udi uleja mudi mêyi aa a divuluija nawu bantu mikale ne bukole.

“Mvua nyikila ne mulongi wetu bua tshimvua musue kuenza pamvua njikija tulasa tua bikadilu. Wakasanka bikole pangakatuadija kumuambila bua Betele, miaba idibu balombuela midimu ya Bantemu ba Yehowa. Yeye kungambila ne: uvua musombele mu tshimenga tshia New York katshia ku buana. Bena mu dîku diabu kabavua batambe kusua malu a Nzambi to, kadi mu dinda dionso pavuaye utangidila pa dididishi, uvua umona pambelu bafunde miaku ivua yamba ne: ‘Bala Bible Munsantu, Dîyi dia Nzambi dituku ku dituku.’ Nenku uvua ubala Bible dituku dionso kumpala kua kuya mu kalasa.

“Pakumbukaye mu tshimenga etshi, wakamba ne: tshintu tshidiye mupangile katshia umbuka mu New York ntshia se: padiye ubika ku tulu, kêna umona kabidi mêyi avua amuvuluija bua kubala Bible to. Kadi anu bua miaku idi ku nzubu wa Société Watchtower, ukadi ne tshibidilu tshia kubala Bible, ke bualu kayi udi utungunuka ne kumubala dituku dionso!”

Mushindu mulenga uudi mua kutuadija dituku ng’wa kubala tshitupa tshia Dîyi dia Nzambi. Wewe muenze nanku, bushuwa neufike ku dijingulula mêyi a mupostolo Paulo a se: ‘[Mifundu minsantu] idi mimanye mua kukuvuija muena meji too ne ku lupandu luakulua bua ditabuja dia mu Kristo Yezu.’​—2 Timote 3:15-17.