Tshisangilu tshia pa buatshi​—Neubuelemu anyi?

KUKADI bidimu bipite pa 3 500, katuena banji kupua muoyo dituku divua Yehowa Nzambi muambile dîku dionso dia bena Isalele bavua mu bupika mu Ejipitu ne: dishipe muana wa mukoko anyi mbuji ne dilabe mashi ku mikamba ya biibi ne ku bipanda bia nzubu yabu. Butuku bua dituku adi, muanjelu wa Nzambi wakapita pa mutu pa nzubu ivua milaba mashi, kadi wakashipa banabute ba mu mêku a bena Ejipitu bonso. Dituku adi bena Isalele bakapatuka mu bupika. Bena Yuda bavua benza Pasaka dia mufikilu wa muanda eu.

Diakamue pakajikija Yezu Kristo kudia Pasaka wende wa ndekelu ne bapostolo bende, wakabanjija didia divua ne bua kuvuluija bantu lufu luende lua mulambu. Wakapesha bapostolo bende diampa kadiyi diela luevene ne kuambaye ne: “Angatayi nudie, etshi mmubidi wanyi.” Pashishe wakabapesha dikopo dia mvinyo ne kuambaye ne: “Nuayi bonso buenu; bualu etshi mmashi anyi a [tshipungidi], apueka bua ba bungi bua kubajimijila mibi yabo.” Yezu wakamba kabidi ne: “Nuikale nuenza nenku bua kumvuluka.” (Matayo 26:26-28; Luka 22:19, 20, MMM) Nenku Yezu wakambila bayidi bende bua kuikalabu basekelela mufikilu wa lufu luende.

Tshidimu etshi mufikilu wa lufu lua Yezu newikale mu Disatu dia matuku 19 ngondo wa Tshisanga kunyima kua dibuela dia dîba. Bantemu ba Yehowa pa buloba bujima nebadisangishe butuku abu bua pa buabu bua kusekelela Tshivulukilu etshi mushindu uvua Yezu muambe. Tudi tukubikila bua ulue kubuelamu netu ne bua umone muditshi tshienzeka. Suaku webeja Bantemu ba Yehowa ba muaba uudi musombele bua bakuambile dîba ne muaba mujalame wenzekela tshisangilu etshi.