Dipa didi Yehowa wangata ne mushinga wa bungi

Biro bia filiale wa Bantemu ba Yehowa mu ditunga dia Mozambique bivua bipete mukanda eu:

“Ndi muana wa balume wa bidimu muanda-mutekete. Ntshitshidi mu tulasa tupuekele. Ndi ntuma makuta aa angakapeta ku nzolo umvua mumune. Ndi mumupane ku Meticais 12 000 [dolare 1]. Ndi ngela Yehowa tuasakidila bua mudiye mungambuluishe bua nzolo wa kumpala undi mumune kuluaye tshitala. Ndi musue benze mudimu ne dipa dianyi edi bua mudimu wa Bukalenge bua Yehowa.

“P.S. Tatu mmungambuluishe bua kufunda mukanda eu.”

Bamue bantu batu bela meji ne: anu aba badi ne bintu bia bungi ke badi mua kuikala bena kalolo. Kadi patudi tubala muyuki udi Bible ulonda bua mukaji mukamba wakela “tukuta tubidi [tua mushinga mutambe bukese]” mu tshibutshilu, tudi mua kumona se: ki mbintu bia bungi bidi bivuija muntu muena kalolo nansha, kadi mmeji mimpe adi asaka mutshima wende.​—Luka 21:1-4.

Yehowa udi wanyisha dipa dionso (nansha diodi dikese peshi dia bungi) didi muntu ufila bualu dinanga didi dimusaka. Ne udi ubenesha bantu badi bidikija kalolo kende padibu bafila dîba diabu, makanda abu anyi bintu bidibu nabi bua mudimu wa Bukalenge buende.​—Matayo 6:33; Ebelu 6:10.