“Yehowa, ndi nyunguluka tshioshelu tshiebe”

“NDI ngowa bianza bianyi tshiyi ne tshilumbu; nunku, Yehowa, ndi nyunguluka tshioshelu tshiebe.” (Musambu 26:6) Mêyi aa ke akamba Mukalenge Davidi kale bua kuleja ne: uvua mulamate Yehowa. Kadi bua tshinyi uvua ‘unyunguluka’ tshioshelu tshia Yehowa ne mmushindu kayi uvuaye utshinyunguluka?

Bua Davidi, muaba menemene wa kutendelela Yehowa uvua tabernakle ne tshioshelu tshia milambu tshivuamu, tshivua tshilamika tshiamu tshia mitaku. Mu tshikondo tshivuaye ukokesha, tabernakle eu uvua ku Gibeona lua ku Nord kua Yelushalema. (1 Bakelenge 3:4) Tshioshelu etshi tshivua ne nseke bule bu bua metre abidi, tshivua tshikese menemene pa kutshifuanyikija ne tshioshelu tshinene tshiakaluabu kuasa mu lubanza lua ntempelo wa Solomo.a Nansha nanku, tabernakle au ne tshioshelu tshivuamu bivua bisankisha Davidi bikole. Muaba eu uvua muaba wa ntendelelu mukezuke mu Isalele.​—Musambu 26:8.

Pa tshioshelu apu ke pavuabu balambuila milambu ya kuosha, ya kuvuija nayi ditalala ne ya kufuta nayi bibawu; ne Dituku dia Dibuikidila, dituku dia pa buadi dia ku tshidimu tshionso, bavua balambuilapu milambu bua tshisamba tshijima. Tshioshelu atshi ne bintu bivuabu balambuilapu bidi ne diumvuija kampanda bua bena Kristo lelu’eu. Mupostolo Paulo wakumvuija ne: tshioshelu atshi tshivua tshileja disua dia Nzambi dia kuitaba mulambu uvua mukumbanyine bua kupikula bantu. Paulo wakamba ne: ‘Mu disua edi tuetu tuakujidikibua bualu bua kufila kua mubidi wa Yezu Kristo musangu umue tshiendelele.’​—Ebelu 10:5-10.

Kumpala kua bakuidi kuyabu ku tshioshelu, bavua banji kuowa mâyi ku bianza bua kudikezula. Nunku, bivua biakanyine muvua Mukalenge Davidi wowa bianza ‘kayi ne tshilumbu’ kumpala kua yeye ‘kunyunguluka tshioshelu.’ Uvua wenza malu ‘mu buimpe ne mu buakane bua mutshima wende.’ (1 Bakelenge 9:4) Bu yeye kayi wowa bianza mushindu’au, Nzambi kavua mua kuanyisha ntendelelu wende peshi ‘dinyunguluka diende dia tshioshelu’ nansha. Bushuwa, Davidi kavua muena Lewi to, nenku kavua ne bukenji bua kuenza mudimu uvua bakuidi benza ku tshioshelu to. Nansha muvuaye mukalenge, kabavua bamuanyishile mene nansha bua kubuela mu lubanza lua tabernakle to. Kadi, bu muvuaye muena Isalele wa lulamatu, uvua utumikila Mikenji ya Mose ne uya pa tshibidilu ne milambu yende bua kuyifilabu ku tshioshelu. Uvua unyunguluka tshioshelu mu ngumvuilu wa se: nsombelu wende uvua mushindamene pa ntendelelu mukezuke.

Tudiku petu lelu’eu mua kulonda tshilejilu tshia Davidi anyi? Eyowa. Tudi petu mua kuowa bianza katuyi ne tshilumbu ne kunyunguluka tshioshelu tshia Nzambi bituitabuja mulambu wa Yezu, ne bituikala ne ‘bianza bidi kabiyi bienza bualu bubi ne mutshima mutoke,’ ne kabidi tusadila Yehowa ne mutshima wetu mujima.​—Musambu 24:4.

[Mêyi adi kuinshi]

[Tshimfuanyi mu dibeji 23]

Tshioshelu tshivua tshileja disua dia Yehowa dia kuitaba mulambu uvua mukumbanyine bua kupikula bantu