Baledi bakabenga kulonda meji a mulongeshi

Mulongeshi kampanda wa mu tshilongelu tshipuekele mu tshimenga tshia Cassano Murge (mu ditunga dia Italie), wakapesha bamue balongi bende mabeji mafunda miaku bua kuyabu nawu muabu. Mabeji aa avua a kulamika ku tshiibi tshia kumpala kua nzubu yabu, ne avua ne dimanyisha edi: “Tudi bena Katolike. Bantemu ba Yehowa kabena ne bua kukokola ku nzubu eku nansha.”

Nansha muvuabu kabayi Bantemu ba Yehowa, baledi ba bamue balongi bakabenga ne muoyo umue malu avua mulongeshi au usua kuenza. Bilondeshile tshikandakanda tshia Muoviti Muoviti, baledi aba bakakema bikole ne kuambabu ne: ‘kupesha bana dimanyisha dia mushindu’eu kudi kubafikisha ku dikina muntu yonso udi kayi ne meji a muomumue ne abu anyi udi mu tshitendelelu “tshikuabu.”’ Muledi mukuabu uvua mutumine bafundi ba tshikandakanda tshine etshi mukanda wakabikila dibeji dia dimanyisha adi ne: “lutete lua lupele, bualu budi buleja dipanga ne butshimbakane.”

Anu mudi meyi aa aleja, bantu bavule ba meji mimpe batu bamona njiwu idiku padi muntu ukuna ntete ya meji mabi munda mua bakuabu. Batu kabidi banemeka mudimu wa bena Kristo udi Bantemu ba Yehowa benza mu ditunga dia Italie ne pa buloba bujima. Bua tshinyi wewe kubenga kubebejaku ‘bua muanda wa ditekemena didi munda muabu’? Nebitabe bua kuyikila nebe, benza nanku ne “[kanemu kakole].”​—1 Petelo 3:15.