Tushalayi balamate Yehowa

NANSHA mudi bantu ba bungi kabayi ne lulamatu lelu, basadidi ba Nzambi mulelela, Yehowa, badi buobu ne ngikadilu eu. Muntu muena lulamatu utu ushala mushindame mu mateta kayi utenkakana nansha bidimu biobi bipite bungi kayi. Tangila tshilejilu tshia Hezikiya Mukalenge muimpe. Bible udi wamba ne: ‘Kakuakadi muntu mukuabu bu yeye munkatshi mua bakalenge ba Yuda bakalonda kunyima kuende, anyi munkatshi mua bakadi kumpala kuende.’ Ntshinyi tshiakavuija Hezikiya mushilangane ne bakuabu? Bible udi wamba ne: “wakalamata Yehowa,” nansha muvuaku bantu bavua batendelela Moleke (nzambi wa dishima). Bulelela, Hezikiya ‘kakasesuka mu njila wa [Yehowa], kadi wakatumikila mikenji yende.’​—2 Bakelenge 18:1-6.

Mupostolo Paulo mmuntu mukuabu wakashala mulamate Yehowa. Muyuki wa mudimu wende udi mu Mifundu ya tshiena-Greke ya bena Kristo udi ujadika bimpe ne: Paulo wakashala ne lulamatu mu mudimu uvuaye wenzela Nzambi ne anyima wende mujima. Pakavuaye ku ndekelu kua muoyo wende pa buloba, Paulo wakamba ne: ‘Ngakuluangana mvita mimpe, ngakujikija tshidikijilu tshia lubilu, ngakulamata ditabuja.’​—2 Timote 4:7.

Bushuwa, Paulo ne Hezikiya mbatushile bilejilu bilenga bia lulamatu. Tuidikijayi ditabuja diabu pa kushala balamate Yehowa Nzambi wetu Munene!​—Ebelu 13:7.