Nnganyi wajikija tshikisu?
MU NGONDO wa tshitema mu 1999, Kofi Annan, Mulombodi wa Bulongolodi bua Matunga Masanga wakakidila bantu bavua balue kubuela mu tshisangilu tshia 54 tshia Tshipangu Tshinene, tshitu tshienzeka tshidimu tshionso. Anu mudibu bafunde mu tshikandakanda kampanda, Mulombodi eu wakaleja bakokeshi ba matunga a pa buloba lutatu ludiku wamba ne: “Kudi bantu bapite bungi badi dijinga ne malu makuabu pa kumbusha anu mêyi a dibumvuila nawu luse a kudi matunga a buloba bujima. Badi dijinga ne dilaya dilelela dianemekabu [kudi matunga aa] bua kubambuluisha bajikije malu a tshikisu adi miaba idibu, ne kubapetesha nsombelu muimpe wabafikisha ku dipeta bubanji.”—The Toronto Star.
Bulongolodi bua Matunga Masanga budiku mua kuenza “dilaya dilelela dianemekabu” didi dikengedibua bua kujikija tshikisu anyi? Mu tshikandakanda tshine atshi mbatelemu mêyi a Bill Clinton, Mfumu wa mu États-Unis, akambaye ne: “Tuamba eku tuela eku, mashi adibu bele panshi mu lukama lua bidimu elu, tudi bamanye mudibi bitekete bua kuamba ne: ‘kabiakuenzeka kabidi to,’ kadi mbikole bua kubikumbaja.” Wakamba kabidi ne: “Kulaya malu mapitepite bungi tudi mua kukuangata bu tshikisu anu mudi kuenzela bantu malu makese menemene.”
Kukadi bidimu bipite pa 2 500, muprofete Yelemiya wakamba bua malu adi bantu benza ne: “[Yehowa] ndi mumanye ne: muntu kena mfumu wa njila udiye ulonda, muntu udi wendenda ewu kena ne bukole bua kuludika makasa ende.” (Yelemiya 10:23, MMM) Kadi tudiku mua kutekemena se: tshikisu netshijike anyi?
Patudi tubala mu Yeshaya 60:18 (MMM), Nzambi wakajadikamu bualu ebu: “Kabakuakula kabidi bua [tshikisu] mu ditunga diebe; tshinyangu nansha kabutu kabiakuikalamu.” Mulayi eu wakakumbana musangu wa kumpala pakapingaja Yehowa bantu bende (bavua ku bupika) mu ditunga diabu. Neukumbane kabidi mu mushindu munene ne malu ikala mua kutusankisha. Yehowa Nzambi kêna ‘ulaya malu mapitepite’ to. Bu mudiye Mutambe Bunene ne Mufuki wa bantu bonso, yeye ke wajikija “malu a tshikisu.” Mu Bukalenge bua Nzambi, ditalala nedikale miaba yonso. Tshikisu netshijike kashidi!—Danyele 2:44.