Bua tshinyi kubuikidilangana?

“TSHIKANDAKANDA kampanda tshia mu ditunga dia Canada (The Toronto Star) tshidi tshiamba ne: “Bena meji mbaditue mu dikeba malu adi matuadije kuleja ne: dibuikidilangana bilema didi mua kusanguluja lungenyi, ne pamu’apa didi mua kupesha muntu makanda a mubidi.” Ne Mulongeshi Carl Thoresen wa mu Iniversite wa Stanford (États-Unis), eu udi ulombola makebulula menza mu Malu a Dibuikidilangana bilema mu Stanford, udi pende wamba ne: anu “bantu bakese menemene ke badi bamanye tshidi dibuikidilangana bilema diumvuija ne mushindu udidi diambuluisha.”

Dibuikidilangana bilema dilelela mmuanda wa mushinga mukole bua bena Kristo. Tshikandakanda tshine atshi tshidi tshiumvuija dibuikidilangana bu “ditaba mudibu bakuenzele bibi, dilekela njiya yonso idi bualu abu bukukebele, ne pashishe kufuila muntu au udi mukuenzele bibi luse ne kumunanga mene.” Dibuikidilangana bilema didi ne bua kushilangana ne dibuikila mêsu pa bualu bubi, dibingisha bubi, dibupua muoyo anyi dibuvila; peshi kadiena diumvuija ne: udi ne bua kubanga pebe kuenzelangana malu a tshikisu nansha. Luapolo lua mu tshikandakanda atshi ludi luamba ne: bua kubuikidilangana tshia bushuwa bidi bikengela “kulekela tshiji ne njiya.”

Bakebuludi badi bamba ne: tudi ne bua kumanya malu a bungi adi atangila bipeta bimpe bidi bifumina ku dibuikidilangana bilema. Badi baleja mudi ngikadilu wa muntu ulengela, ushala katshiyi ne “dibungama, kanyinganyinga ne tshinyongopelu tshia bungi to.”

Bualu bua mushinga butudi ne bua kuikadila tubuikidilangana bilema mbabumvuije mu Efeso 4:32 mutudi tubala ne: ‘Nulejangane kalolo, nuikalangane ne mitshima ya luse, nulekelangane malu mabi enu bu muakanulekelela Nzambi malu mabi enu mu Kristo.’ (Disendamija miaku ndietu.) Bua bidi bitangila dibuikidilangana bilema, ne kabidi bua malu makuabu a bungi, mbatubele bua kuidikija Nzambi.​—Efeso 5:1.

Kubenga kubuikidila bakuabu bilema padiku bualu budi bulomba bua tuetu kubafuila luse kudi mua kunyanga malanda etu tuetu bine ne Nzambi. Yehowa mmutekemene bua tuikale tubuikidilangana bilema. Anu tuetu tuenza nanku ke tuetu kushisha kumulomba bua yeye kutubuikidila petu bilema.​—Matayo 6:14; Mâko 11:25; 1 Yone 4:11.