Muoyo webe udi mua kupeta mushinga wa bungi anyi?

MUSHINGA mulelela wa tshintu kautu anu udi mufundapu to. Dibeji dia makuta a bungi menemene dikadibu bapatule mu États-Unis ndia dolare 10 000. Pabi, dibeji edi didibu benza nadi makuta aa didi ne mushinga wa santime mikese patupu.

Ukadiku mudikonke bua kumanya bikala bitupa bia mabeji a mushinga mukese mua kupesha muoyo webe mushinga mulelela anyi? Bantu ba bungi batu bela meji ne: bidi mua kuenzeka nanku. Bantu miliyo mivule batu benza mudimu butuku ne munya bua kupeta makuta a bungi menemene. Pamu’apa bua kupeta mfranga eyi, batu benza malu mapitshidile makanda abu a mubidi, kabayi mene batshuka balunda babu ne mêku abu to. Ntshinyi tshitubu bapeta? Makuta anyi bintu bitudi tusumba nawu bidi mua kutupesha disanka dilelela dia kashidi anyi?

Bakebuludi badi bamba ne: patudi tutamba kukeba disanka mu bubanji, katuena tudipeta nansha. Kamona-kamba Alfie Kohn udi wamba ne: “disanka kabatu badisumbisha to. . . . Bantu badi bateka bubanji kumpala batu bapeta tunyinganyinga ne dibungama dikole ne nsombelu wabu katu muimpe to.”​—International Herald Tribune.

Nansha mudi bakebuludi bamone ne: makuta kaena mua kupesha muntu muoyo udi ne mushinga, bantu ba bungi kabena buobu bamona nanku to. Kabiena bitukemesha to, bualu bantu badi basombele mu matunga a ku Mputu ne a mu Amerike batu bateleja mbila 3 000 ku dituku idibu belela bintu bia kusumbisha. Nansha bakula bua mashinyi anyi bua bombom, tshidi kuoku ntshia se: ‘Nuenu basumbe tshintu etshi, nenusanke bikole.’

Dielela bintu mbila edi didi kadiyi dijika ndifikishe ku tshinyi? Misangu mivule bantu bakadi balengulula malu a mu nyuma. Bilondeshile tshikandakanda kampanda, muepiskopo wa mu tshimenga tshia Cologne (mu Allemagne) wakamba matuku mashale aa ne: “Bantu kabatshiena bakula kabidi bua Nzambi nansha.”​—Newsweek.

Pamu’apa udi mufile makanda ebe onso mu dikeba makuta. Imue misangu udi wela meji ne: kuena ne dîba dia bungi dia kuenza malu makuabu to. Kadi ku misangu udi mua kumona ne: kudi ne bua kuikala tshintu tshidi mua kuvuija muoyo webe ne mushinga wa bungi kupita ditungunuka ne kuenza mudimu umue-umue udi utshiokesha too ne padi makanda a mubidi akujika anyi bukulakaje bukukuata.

Kadi kutamba kunanga malu a mu nyuma kudiku mua kukupetesha disanka dia bungi anyi? Ntshinyi tshidi mua kuvuija muoyo webe ne mushinga wa bungi?