Malu mimpe adi atumbishisha Nzambi

BANTU badi banange Nzambi batu badienzeja bua kumuenesha butoke bua mu nyuma budi mu Mukanda wa Nzambi. Nenku badi balonda dîyi diakatuma Yezu ne: ‘Butoke buenu butokeshe ku mêsu a bantu bonso, bua bamone malu enu mimpe, batumbishe Tatu wenu udi mu diulu.’ (Matayo 5:16, MMM) Mêyi ne tshikadilu tshietu tshimpe bidi mua kutumbishisha Nzambi.

Bantemu ba Yehowa batu bakeba bua kusankisha Nzambi padibu benza malu adi umvuangana ne Bible ne padibu badienzeja bua kuambuluisha bantu bakuabu mu nyuma. Badi benza malu aa nansha mu matunga mudi mbulamatadi kayi muanji kuanyisha mudimu wabu wa diyisha. Tshilejilu, mu tshimenga tshikulu tshia dimue dia ku matunga aa, Bantemu batu benzamu mpungilu ku tshidimu tshionso ne bantu bakadi babuelemu babangile ku 6 000 too ne ku 9 000. Bua kuenza bisangilu ebi, batu bafutshila nzubu ya muaba utubu balejila manaya kabukabu. Anu bu muakenzabu mu bidimu bishale, kumpala kua mpungilu wa mu tshidimu tshia 1999, Bantemu nkama ne nkama bakenza mudimu wa bungi bua kusukula nzubu eyi ne bua kuasa bikolokolo ne kuteka nkuasa binunu bivule.

Bantu bavua bamone bionso bivua bienzeka ebi. Batangidi ba nzubu eyi bakamona muvua midimu eyi yenzeka. Bakamona kabidi ne: nansha muvua bantu 15 666 babuele mu mpungilu eu, malu onso akenzeka bimpe ne Bantemu bavua ne bulongame bua bungi. Batangidi aba bakakema kabidi bua mushindu wakasukulabu bimpe nzubu eyi kunyima kua mpungilu.

Bua kuleja dianyisha diabu bua bionso ebi, bakateka Bantemu ba Yehowa pa muaba wa kumpala bua kuluabu kufutshila nzubu eu tshidimu tshivua tshilonda. Kadi batangidi aba bakenza bia bungi kupita ne apu. Mu dia 15 Kashipu 1999, bakapesha komite wa mpungilu dibaya kampanda bua kuleja dianyisha diabu. Bakafunda pa dibaya edi ne: “tshisumbu tshia Bantemu ba Yehowa.” Ebu mbualu butu kabuyi buanji kuenzeka mu ditunga mudibu bakandike mudimu wabu wa kulongesha bantu Bible.

Pa buloba bujima mu tshidimu tshia 2000 ne tshia 2001, bantu miliyo mivule nebabuele mu nkama ya Mpungilu ya Distrike ya “Benji ba Dîyi dia Nzambi” yenza Bantemu ba Yehowa. Wewe mubuelemu, udi mua kudimuena ne ebe abidi mushindu udi bantu badi batumikila ne muoyo mujima tshidi Bible wamba bikale benza malu mimpe adi atumbishisha Nzambi.