Mmunyi mudi meji a kudi Nzambi amueneka patoke?

“KABENA bangata meji a mupele ne mushinga; miaku yende, muntu nansha umue kena uyiteleja.” Mêyi aa ngavua Mukalenge wa meji Solomo mujikije nawu muyuki wende wa muntu mupele kadi muikale ne lungenyi, uvua mupandishe tshimenga tshijima bua kabatshibutudi. Kadi, “kakuena muntu udi mushale uvuluka mupele ewu”.​—Muambi 9:14-16, MMM.

Bantu batu bapepeja bakuabu badi kabayi ne bubanji, nansha bikala bapele aba benze malu mimpe matambe. Ke tshivua tshienzekele Yezu. Yeshaya wakamba bua bualu buende ne: “Bavua bamupepeja, bamubenga kudi bantu, uvua mumone makenga ne ntatu ya bungi.” (Yeshaya 53:3, MMM) Bavua bapetula Yezu kudi bamue bantu anu bualu kavua ne muanzu anyi bubanji bua buena buvua nabu banene ba mu tshikondo tshiende. Pende uvua ne meji avua mapite a bantu bena mpekatu bonso. Bena mu musoko wa ba Yezu bakabenga kuitaba ne: “muana wa muena mabaya” eu uvua mua kuikala ne meji a mushindu’eu ne kufika ku dienza bishima bia nunku nansha. Atshi tshivua tshilema tshinenanenayi, bualu muyuki au udi wamba ne: Yezu ‘kakenzamu malu a kukema a bungi bualu bua bupidia buabu.’ Bantu abu bavua badipangishe malu mapite bungi!​—Matayo 13:54-58.

Katuenjiku tshilema tshia muomumue to. Yezu uvua muambe ne: ‘Meji adi adileja malelela ku bienzedi biawu.’ Bantu badi benza mudimu wa Nzambi ne bapeta meji a mu diulu mbasunguluke wabu mushindu, ki mbua mianzu anyi bua nsombelu udibu nende, kadi bua ‘mamuma mimpe’ adibu bakuama: ditabuja ne bienzedi biabu bishindamene pa Bible.​—Matayo 7:18-20; 11:19, MMM.