Padi kupuwa kumvuija kuitaba

MUKANDA mukuabu udi umvuija bimpe mudimu uvua nawu bitendelelu mu bukokeshi bua bena Nazi. Mukanda eu udi ujadika ne: “Nangananga Bena Kristo ke bavua belesha bukokeshi ebu diboko, ne ba bungi kabakakokesha musangu nansha umue bua kuakuila bena Yuda kudi bantu bavua babakengesha to. Mu muanda eu, kushala bapuwa kudi kuleja meji adi munda.”​—Betrayal—​German Churches and the Holocaust.

Ntshinyi tshiakafikisha bena Kristo ba ku dîna ku dianyisha bukokeshi bua bena Nazi? Mukanda muine eu udi umvuija ne: ba bungi bavua basue “lungenyi lua dilonda mikenji ne mêyi bia bena mu Allemagne” luvua nalu Hitler. Mukanda eu udi wamba kabidi ne: “[Hitler] uvua mukandike bindidimbi bia bantu butaka, bundumba, ditula dia mafu, dilala dia balume ne balume nabu, ne ‘malu a bundu’ adi mu bintu bia buena lelu bidibu benza, ne uvua upesha bakaji bavua balele bana banayi, basambombo, anyi muanda-mukulu mindadi ya bronze, ya argent, ne ya or bua kubakankamika bua bashale anu mu midimu yabu ya nzubu ya katshia ku bankambua. Dilamata dia malu a bankambua edi ne tshididi tshia busalayi tshia diluila ditunga mvita tshivua Hitler mupatule bua kupetula Tshipungidi tshia mu Versailles, biakavuija bukokeshi bua Nazi tshintu tshivua tshikoka bantu bavule, nangananga bena Kristo ba mu Allemagne.”

Kadi, kuvua tshisumbu tshimuepele tshivua tshiotshi tshishilangane nabu bikole. Mukanda wa Betrayal udi wamba ne: “Bantemu ba Yehowa bakabenga bua kubuelakana mu malu a tshikisu anyi mu busalayi.” Bualu ebu buakakebela tshisumbu tshikese etshi buluishi bukole, ne bakela bantu ba bungi bavuamu mu maloko manene. Kadi bakuabu bavua badiamba muvuabu balongi ba Kristo bakashala anu bapuwe. Mukanda eu udi wamba kabidi ne: “Bena Katolike ne bena Mishonyi mu tshibungi bakaleja muvuabu bakine Bantemu ba Yehowa pamutu pa kubumvuilabu luse, bavua banange malu a tshikisu a Hitler pamutu pa kunanga malu a ditalala a Bantemu.” Bushuwa, dishala bapuwe diabu diakakoleshisha dikenga dia Bantemu mu bukokeshi bua bena Nazi.

Nansha mudi dibuela dia bitendelelu mu malu a tshididi a bena Nazi ditungunuka ne kujudija ndululu mikole, mukanda wa Betrayal udi ubikila Bantemu ba Yehowa ne: “tshisumbu tshia malu a Nzambi tshiakabenga bua kukuatshisha anyi kubuelakana mu bukokeshi abu.”