Dinanga dia bena Kristo kaditu anu dia ku mishiku

BENA dîku dia Bartholomew bakajimija bintu biabu bionso pakosheka nzubu wabu mu Trinidad. Mulela wabu mukuabu uvua pabuipi nabu wakabateka kuende, kadi kakuvua kujike to.

Olive Bartholomew udi Ntemu wa Yehowa; bena mu tshisumbu tshidiye ne ba mu bisumbu bikuabu bidi muaba au bakabanga kusangisha bintu bua kuibakulula nzubu uvuabu bajimije ne bena dîku diende. Bakenza komite uvua mua kulombola mudimu wa dibakulula nzubu eu, kutuadijabu kuibaka. Bantemu batue ku 20, pamue ne bamue bena mutumba bakenza mudimu eu. Too ne bansonga bakalua kuambuluisha, bakuabu pabu bavua balua ne biakudia ne biakunua.

Mbaleje mu tshibejibeji tshikuabu tshia mu Trinidad (Sunday Guardian) ne: Olive wakamba ne: “Bena mu dîku dietu badi bakema banyina. Ki m’Bantemu to, kadi bayanyi utshidi anu ukatshila bua tshidiye umona.”

Pavua mulombodi wa mudimu wa luibaku elu umvuija mu tshikoso mushindu uvua bukole bua mudimu uvua muenzeke, wakashindika ne: bua kuamba bulelela, bienzedi bia mushindu’eu ke bimanyinu bia bena Kristo balelela. Wakamba ne: “Katutu anu tuya bua kulongesha bantu dinanga ku nzubu ne ku nzubu nansha. Kadi tutu tuditatshisha bua kutumikila bitudi tuyisha.”​—Yone 13:34, 35.

[Tshimfuanyi mu dibeji 32]

Olive Bartholomew ne bayende