“Dishina dia ngulungu didi dilengele ku mesu”

BANTU ba bungi kabatu mua kuamba mbuji wetu eu anyi ngulungu ne: mmulengele ku mêsu to. Mbuji nnyama itudi tuanyisha bualu itu idia tshintu pabuipi ne tshionso ne itu ne munyinyi mushême ne mabele adi ne vitamine, kadi katuena mua kuyamba ne: mmilengele ku mêsu to.

Kadi, Bible udi ubikila mukaji ne: ‘ntole mukaji udi muena dinanga, dishina dia ngulungu [anyi dia mbuji wa ku mikuna] didi dilengele ku mêsu.’ (Nsumuinu 5:18, 19) Bu muvua Solomo (muntu wakafunda mukanda wa Nsumuinu) mumanye bimpe nyama ya ditu ya mu Isalele, kakuyi mpata wakafila tshimfuanyi etshi ne kafidila. (1 Bakelenge 4:30-33) Pamu’apa, anu bu tatuende Davidi, ukavua mumone ngulungu ilua kunayila muaba udibu babikila ne: Ene-gedi, pabuipi ne ku mielelu ya Mbuu Mufue.

Bisumbu bikese bia ngulungu bidi bisombele pabuipi ne Tshipela tshia mu Yuda bitu biya pa tshibidilu ku mâyi a Ene-gedi. Bu mudi Ene-gedi muikale musulu umuepele udi ne mâyi mimpe mu tshitupa tshia tshipela etshi, ngulungu itu misue kunua mâyi a musulu eu. Dîna Ene-gedi didi pamu’apa diumvuija: “mushimi wa kana ka mbuji,” tshijadiki tshia se: tuana tua mbuji ya tshisuku anyi ngulungu tutu tutambakana muaba eu pa tshibidilu. Nansha muvua Mukalenge Davidi muikale utua eku utua eku anyi uwayawaya ‘munkatshi mua mabue akadi mbuji ya mu mpata yendelapu,’ muaba eu ke wakasokomenaye dîba divuaye unyema Mukalenge Shaula.​—1 Samuele 24:1, 2.

Wewe ku mâyi a Ene-gedi, udi mua kumona ngulungu wenda upueka bitekete-bitekete mu lupongo lua mabue, wenda ulonda mulume wa ngulungu ku mâyi. Pashishe udi mua kubanga kumvua difuanangana didi pankatshi pa dishina dia ngulungu ne mukaji wa lulamatu. Lutulu ne ngenzelu wende mulenga wa malu bidi kabidi bileja ngikadilu mimpe ya mukaji. Bidi bimueneka ne: miaku eyi “mulengele ku mesu” idi ileja mushindu utu mbuji wa ku mikuna umueneka ne kanemu.a

Dishina dia ngulungu ditu ne makanda ne kanemu kabidi. Anu muvua Yehowa muambile Yobo, mbuji wa ku mikuna utu ulelela mu mbuebue, miaba mikole bua kufikapu, miaba idi biakudia bikale bikese ne luya luikale lua bungi. (Yobo 39:1) Nansha mudiku ntatu eyi, utu ulama bana bende ne ubalongesha mua kubanda ne kutumpika mu mabue mu lubilu. Utu kabidi ukuba bana bende ku nyama anyi nyunyi itu ikuata mikuabu bua kuyidia. Muntu mukuabu wakamona ngulungu uluangana ne nyunyi wa mukanku minite 30, musokoke muanende mu mikolo.

Bakaji ne bamamu bena Kristo batu misangu ya bungi bakolesha bana babu mu ntatu mikole. Batu badifila ne muoyo umue bua kukumbaja mudimu udi Nzambi mubapeshe eu anu bu ngulungu. Ne batu badienzeja bikole bua kukuba bana babu ku njiwu ya mu nyuma. Nunku, muaba eu Solomo kavua upepeja bakaji ne tshimfuanyi etshi to, kadi uvua uleja kanemu ne bulengele bua mukaji, mbuena kuamba ne: ngikadilu ya mu nyuma idi imueneka nansha mu ntatu mitambe bukole.

[Mêyi adi kuinshi]

[Bimfuanyi mu mabeji 30, 31]

Padi mukaji udi mamu muena Kristo wenza midimu idi Nzambi mumupeshe, udi uleja ne: udi ne ngikadilu milenga ya mu nyuma