“Tshilejilu tshia buobumue”

ETSHI ke tshivua tshiena-bualu tshivua tshi- patuke mu tshikandakanda tshikuabu tshia mu Indaiatuba, mu tshimenga tshia São Paulo, mu ditunga dia Brésil. Mbanganyi bakafila tshilejilu atshi? Mufundi wa tshikandakanda etshi wakumvuija ne: “Bantemu ba Yehowa, badi bakeba kuibaka ‘Nzubu wa Bukalenge’ mupiamupia (ke mutubu babikila bitanda anyi nzubu yabu ya masangisha) badi bafila tshilejilu tshimpe tshia bantu badi bamanye mua kuenza mudimu pamue, tshilejilu tshidi bantu bonso bamone.”

Buobumue budi munkatshi mua Bantemu ba Yehowa butu bumueneka dîba ditubu benza midimu ya nunku. Tshiena-bualu atshi tshiakaleja ne: “Bidi bisankisha bikole bua kumona balume, bakaji, ne bansonga benza mudimu pamue kakuyi muntu ubenzejawu ku bukole, banyishe bua kuibaka muaba udibu mua kudisangishila bua kutendelela Nzambi.”

Bantemu ba Yehowa batu bafila tshilejilu tshimpe mu malu makuabu kabidi. Tshiena-bualu atshi tshiakamba kabidi ne: “Pa kumbusha disambila ne dilonga dia Bible, tshipatshila tshiabu tshikuabu ntshia kuambuluisha bantu bua balekele dikuatshika dia maluvu ne dinua dia diamba ne kubaleja mua kunangangana ne kusomba mu buobumue.” Ntshinyi tshidi tshibambuluishe bua kukumbaja malu aa? Bantemu mbamanye ne: kulonga ne kutumikila mibelu ya mu Bible kudi kuambuluisha muntu bua kulekela malu mabi. Ke bua tshinyi badi balongesha bakuabu malu adibu balonge mu Bible. Tshiena-bualu atshi tshidi tshijika ne mêyi aa: “kakuyi mpata, tshilejilu tshiabu ke tshitudi ne bua kulonda ne lukasa.”

Muntu yonso udi mua kubuela mu bisangilu bia Bantemu ba Yehowa. Kabatu bendeshamu tubondo tua mfranga bua bantu kuelamu makuta to. Tudi tukulomba bua uye ku Nzubu wa Bukalenge udi pabuipi nebe.