Ditalala dia buloba bujima nedilue mushindu kayi?
DITALALA dia buloba bujima dikadi pabuipi anyi? Bantu ba bungi bavua bela meji kumpala ne: dikadi pa kulua, kadi lelu bakadi belakana. Bilondeshile malu adibu bambe mu tshikandakanda kampanda tshia mu ditunga dia Afrique du Sud bua ntatu yatukuata mu matuku atshilualua, “malu akamanyishabu kukadi mpindieu bidimu 10 patupu ne: nekuikale bulongolodi bupiabupia bua buloba bujima akadi patudi tuakula apa amueneka kaayi malelela to.”—Daily Mail & Guardian.
Bafundi ba tshikandakanda etshi badi ne lungenyi luvua nalu bantu bavule kukadi mpindieu bidimu dikumi. Mvita ya Muinshimuinshi ikavua mijike, ne diluishangana dia matunga avua ne bukole dikavua dijike. Patuakafika mu tshivua tshimueneka bu ntuadijilu wa tshikondo tshipiatshipia, ba bungi bakela meji ne: bantu bavua mua kubanga kujikija bupele, masama ne ntatu miaba idibu basombele. Tshikandakanda atshi tshidi tshileja ne: “Malu au avuabu bamanyishe, mpindieu adi amueneka bushuwa ne: avua malu mafuikakaja patupu. Mvita mmibudike miaba ituvua katuyi tuyelela meji nansha makese; bupele budi buenda buvula pa buloba bujima. Makuabu matunga abidi adi pawu mpindieu ne bingoma binene bidi bibutula bikole. Bulongolodi bua Matunga Masanga mbuende lumu lubi bualu mbupangile bua kujikija makenga bungi tshianana adi nawu bantu. Malu enda ashintuluka; bakadi batekemena makenga pa mutu pa masanka.”
Bantu badi balonga Bible mbamanye bimpe ne: malu adi bantu benza, nansha buobu baenza ne meji mimpe, kaena mua kukumbana bimpe menemene to. Bua tshinganyi? Bible udi wamba ne: “buloba bujima budi mu bukokeshi bua mubi.” (1 Yone 5:19, Muanda Mulenga Lelu) Bu mudi buloba buikale ku bukokeshi bua Satana, bantu kabena mua kubuandamuna Mparadizu muvua Nzambi mulongolole pakabufukaye to.
Kadi nansha nanku, kudi bualu bukuabu budi butukolesha ku muoyo. Yehowa Nzambi mmulaye ditalala dia buloba bujima, ki mpa kulengeja ndongoluelu eu mubi wa malu to, kadi mmulaye bua kujadika ‘buloba bupiabupia mudi buakane buikalamu.’ (2 Petelo 3:13) Bukalenge bua Nzambi ke buandamuna buloba ebu ne buabuvuija muaba wa ditalala ne disanka, muaba wikala muoyo ne mudimu mua kusankisha bantu bonso bena butumike kashidi ne kashidi. Nzambi mmulaye kabidi bua ‘kukupula tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi.’ Milayi eyi ki mmishindamene pa malu adi kaayi majalame adi bantu bamanyisha nansha. Kadi, mmishindamene pa Dîyi dia Mufuki ditu kadiyi mua kuya panshi, bualu yeye katu mua kushima.—Buakabuluibua 21:4; Tito 1:2.