Bitendelelu bikadi pa kushala mu buobumue anyi?
Christian Krause (mulombodi wa Tshipangu tshia bena Luther ba pa Buloba bujima) wakamba ne: “Tudi tuenda tumona dituku dinene mu malu a ekeleziya yetu.” Bia muomumue, Pape Jean-Paul II wakakula pende bua “muanda wa mushinga mukole mu njila wa ntatu eu utudi base bua kupingaja tshiakabidi buobumue bua menemene munkatshi mua bena Kristo.”
Tshivua tshipatuishe mêyi a musangelu aa tshivua biala biakatuabu pa mukanda wa Mêyi a Diumvuangana a Bamfumu ba ekeleziya mu dia 31 ngondo wa dikumi 1999, mu tshimenga tshia Augsbourg (Allemagne), bua kujadika Dimanyisha dia Tshia pamue dia Dilongesha dia Dibingishibua dia muntu. Bavua basungule bimpe dîba ne muaba wakenzekela bualu ebu. Batu bamba ne: mu dia 31 ngondo wa dikumi 1517, Martin Luther wakalamika ku tshiibi tshia nzubu munene uvuabu benzela masambila ku Wittenberg malongesha ende 95 avuaye mufunde, bua bualu ebu Ekeleziya Muakajilula wa bena Mishonyi kubangishaye. Ku Augsbourg ke ku musoko kuvua bena Luther bamanyishile mu 1530 padi mitabuja abu mashindamene. Malu a Dimanyisha dia ku Augsbourg akabengabu kudi Ekeleziya Katolike akafikisha ku dikosolokangana didi kadiyi mua kujika didi pankatshi pa bena Mishonyi ne bena Katolike.
Dimanyisha dia Tshia pamue dia Dilongesha edi nedikaleku tshidia tshinene tshia ditshimuna diabuluka dia ekeleziya bu mudibu bamba anyi? Bitupa bionso bidi biabuluka kabiena bimona bualu nunku to. Bena teoloji ba mu Mishonyi bapite pa 250 bavua batue biala pa mêyi avua abengangana ne a kumpala aa, bavua badimuija bantu bua kabayi kukuatshika mu buteyi bua bena Katolike to. Bena Mishonyi bavua kabidi bafiike munda pavua Ekeleziya Katolike mumanyishe ditonda ne dilomba luse dia pa buadi bua tshidimu tshia 2000. Bualu bumue bumue buakakebesha dikosolokangana kukadi kupite bidimu 500. Bu mutshidibu balonda Dimanyisha diakenzeka ku Augsbourg, eku bena Katolike balonda Tshipangu tshia ku Trente tshidi ne mêyi akatuabu biala bua kubenga dimanyisha adi, mbikole menemene bua kufika ku buobumue.
Diabulukangana ne dibenga kumvuangana munkatshi mua Bukua-buena-Kristo mbualu bunene menemene kupita tshidi ditua biala pa mêyi a diumvuangana mua kuakaja. Bualu bukuabu budi ne: buobumue mu ditabuja mbuimanyine pa malongesha a mu Bible. (Efeso 4:3-6) Buobumue bulelela budi bufumina ku dilonga ne dienza tshidi Nzambi utulomba, ki nku diumvuangana dia bantu nkayabu nansha. Muprofete wa lulamatu Mika wakamba ne: ‘Ba mu bisamba bionso batshidi benda muntu ne muntu mu dîna dia nzambi wende; kadi tuetu netuende mu dîna dia Yehowa Nzambi wetu tshiendelele.’—Mika 4:5.
[Mêyi a dianyisha bua tshimfuanyi mu dibeji 32]
© Ralph Orlowski/REUTERS/Archive Photos