Ditalala nedikaleku mu bidimu tshinunu bipiabipia ebi anyi?

BAVUA babanjije Tshidimu tshia Dilongesha Ditalala pa Buloba Bujima mu tshimenga tshia Paris ne mu tshia New York mu dituku dia 14 ngondo wa tshitema, mu 1999. Tshipangu Tshinene tshia Bulongolodi bua Matunga Masanga ke tshivua tshimanyishe bualu buvua butangila tshidimu tshia 2000 ebu. Federico Mayor, mulombodi wa kale wa UNESCO, wakela lubila ne muoyo mujima bua “kuenza tshisumbu tshidi mua kulongesha bantu mua kusomba mu ditalala ne kubenga bimvundu.”

Bena mu UNESCO batu bamba ne: “bu mutu mvita ibangila mu ngenyi ya bantu, bidi bikengela kuashila bia kukeba nabi ditalala mu ngenyi ya bantu.” Mêyi aa adi aleja ne: bulongolodi bua UNESCO mbusue bua bantu balonge mua kusomba mu ditalala ku diambuluisha dia “tulasa, dishintakaja dia ngenyi ne dienza mudimu pamue.” Federico Mayor wakamba ne: kuikala patupu “muena ditalala, anyi mene kujinga ditalala ki nkukumbane to, bidi bikengela kuikala bakebi ba ditalala.”

Diakabi, tshidimu tshia 2000 katshivua tshidimu tshia ditalala nansha kakese. Malu adi menzeke tshikondo tshietu etshi (kusangisha ne a mu tshidimu tshia 2000) mmaleje ne: muntu kêna ne bukole bua kukanda mvita ne bimvundu nansha mudiye wenza muende muonso bua kubijikija to.

Kadi tshia tuetu kumanya ntshia se: ditalala ne dilongesha bidi bienda pamue. Kukadi bidimu bu 2 700, muprofete Yeshaya wakamba ne: “Bana bebe bonso nebikale bayidi ba Yehowa; ditalala dia bana bebe nedikale dinene.” (Yeshaya 54:13; tuetu mbadi baladike maleta.) Yeshaya wakadianjila kumanyisha kabidi tshikondo tshivua bantu ba bisamba bionso ne bua kuya ba bungi ku ntendelelu mulelela wa Yehowa Nzambi bua kulonga njila Yende. Ntshinyi tshivua ne bua kuenzeka pashishe? “Bantu nebatshibule miele yabo ya mvita, bayenze bikasu; nebatshibule mafuma abo, baenze miele ya kudima nayo. Tshisamba katshiakutudila tshikuabo muele wa mvita; bantu kabakulonga mua kuluangana mvita.” (Yeshaya 2:2-4, MMM; tuetu mbadi baladike maleta.) Anu mudi mulayi eu uleja, Bantemu ba Yehowa badi benza mudimu wa dilongeshangana pa buloba bujima. Mudimu eu ukadi muambuluishe bantu miliyo ne miliyo bua kulekelabu kukina bena matunga ne makoba adi mashilangane ne abu, bualu nkuna eyi ke itu ikebesha mvita misangu ya bungi.

Kadi bu muikala Bukalenge bua Nzambi mua kufila ditalala ne bupole bia kashidi pa buloba, mvita neijike. (Musambu 72:7; Danyele 2:44) Pashishe, mêyi a mufundi wa Misambu adi alonda aa neakumbane: ‘Tangilayi bienzedi bia Yehowa, bu muakuenzejaye dibutuka dia bungi pa buloba. Yeye udi ulekesha mvita bua ijike too ne kumfudilu kua buloba.’​—Musambu 46:8, 9.