Henry VIII ne Bible
WINSTON Churchill wakafunda mu mukanda wende kampanda (History of the English-Speaking Peoples, Volime 2) ne: “Mu malu a bitendelelu, Dishintuluka diakalengeja malu bikole. Mpindieu Bible wakapeta bukokeshi bupiabupia budi buenda budiunda bikole. Bantu ba kale bavua bamona Mifundu Minsantu mikale ne njiwu padiyi mu bianza bia bantu bavua kabayi balonge, ne bua nanku bavua ne bua kuyibala anu kudi bansaserdose.”
Mukanda ewu udi utungunuka wamba ne: “Bible mijima mituta ku tshiamu, mikudimuna mu Anglais kudi Tyndale ne Coverdale, ivua mipatuke musangu wa kumpala mu muvu wa automne wa 1535, ne bavua mpindieu benda bapatula nkudimuinu ya bungi. Mbulamatadi wakambila balombodi ba bitendelelu bua bakankamije bantu bua kubalabu Bible.” Panyima pa bidimu bia bungi bidi bantu bashale kabayi ne dimanya dia mu Bible ne malu adimu, bena mu ditunga dia Angleterre bakafika ku dibala Bible ku diambuluisha dia mbulamatadi wa Henry VIII, kadi ki nku diambuluisha dia ekeleziya nansha.a
Bua kumona mua kupangisha kabidi aba bavua ne ngenyi ya kale pa bidi bitangila Bible, Mbulamatadi wakapatuisha Bible mivule menemene ya mu Anglais mu tshimenga tshia Paris, mikale milengeja tshishiki (de luxe) kupite yonso ya kumpala, ne mu ngondo wa tshitema mu 1538, wakatuma dîyi bua parwase yonso wa mu ditunga edi asumbe Bible wa munene menemene wa mu Anglais, bua kumutekabu mu ekeleziya yonso, muvua bena parwase ba bungi mua kufika bipepele ne kumubala. Bakateka Bible isambombo mu Katedrale Saint-Paul ka mu tshimenga tshia Londres, ne bantu binunu ne binunu bavua buula tente mu katedrale emu dituku dionso bua kubala Bible eyi, badi batuambila ne: nangananga pavuabu bapeta muntu uvua ne dîyi dikole bua kubalaye.”
Bia dibungama, mu matunga mavule, bantu ba bungi kabena bamona bulenga bua kubala Bible pa tshibidilu to. Ebu mbualu bunene budi ne bua kunyingalaja, bualu anu Bible nkayende ke ‘udi mufume munda mua Nzambi bu mupuya wende, ne udi ne mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi.’—2 Timote 3:16.
[Mêyi adi kuinshi]
a Mukalenge Henry VIII wakashala mfumu wa ditunga dia Angleterre kubangila mu 1509 too ne mu 1547.
[Mêyi a dianyisha bua tshimfuanyi mu dibeji 32]
Henry VIII: Painting in the Royal Gallery at Kensington, from the book The History of Protestantism (Vol. I)