Malu mimpe adi atumbishisha Nzambi

BENA KRISTO balelela badi batumbishisha Nzambi ku ngikadilu milenga ne ku malu mimpe. (1 Petelo 2:12) Bualu ebu budi mua kumuenekela patoke ku malu avua menzeke mu ditunga dia Italie mu bidimu bishale ebi.

Mu ngondo wa tshitema wa tshidimu tshia 1997, tshikumina tshikole tshiakenzeka mu bitupa bishilangane bia rejon wa Marches ne wa Ombrie, kunyangatshi nzubu mitue ku 90 000. Bantemu ba Yehowa bakambuluisha diakamue bena Kristo nabu ne bantu bakuabu. Bakabapesha kontenere, tulalu tua dibunya, matshiuwa a nzembu, miotere ya nzembu ne bintu bikuabu bivuabu nabi dijinga. Bantu kabakapanga kumona diambuluisha edi to.

Tshikandakanda tshia Il Centro tshiakamba ne: “Bantu ba kumpala bakafika ne diambuluisha miaba ivua tshikumina tshienzeke bavua Bantemu ba Yehowa ba mu Roseto [mu provense wa Teramo]. . . . Pa kumbusha didisangisha diabu dia pa tshibidilu bua kusambila, aba badi ne lulamatu kudi Yehowa badi benza malu mimpe, bambuluisha badi bakenga, kabayi bajinga kumanya tshitendelelu tshidibu.”

Mutangidi wa tshimenga tshia Nocera Umbra (tshimue tshia ku bimenga bivua binyanguke bikole), wakafundila Bantemu ne: “Ndi nnuela tuasakidila ne muoyo mujima bua bintu binudi bambuluishe nabi bantu ba mu Nocera. Ndi mujadike ne: bindi ngamba ebi mbidi mu mitshima ya bonso badi basombele mu tshimenga etshi.” Kabidi, Ministre muomekela Mianda ya Munda mua ditunga wakapesha Congregazione Cristiana dei Testimoni di Geova (Tshisumbu tshia bena Kristo Bantemu ba Yehowa) diploma ne mundadi bua “kujadika mudimu udibu benze ne bua tshisumi tshidibu benze natshi midimu ya diambuluisha bantu mu tshipupu tshiakenzeka mu rejon wa Ombrie ne wa Marches.”

Mu ngondo wa dikumi wa 2000, mâyi akasapalala mu rejon wa Piémont ku Nord kua ditunga dia Italie. Musangu eu kabidi, Bantemu bakaya ne lukasa bua kuambuluisha. Bantu kabakapanga kumona kabidi malu mimpe aa to. Bena mu Rejon wa Piémont bakapesha Bantemu tablo anyi dibaya difunda miaku bua kubela kalumbandi bua “mudimu mulenga wa budisuile udibu benze bua kuambuluisha bantu ba mu Piémont muvua mâyi masapalale.”

Yezu Kristo wakalongesha bayidi bende ne: “Butoke buenu [budi] ne bua kutokesha ku mesu a bantu bonso, bua bamone malu enu mempe, batumbishe Tatu wenu udi mu diulu.” (Matayo 5:16, MMM) Padi Bantemu ba Yehowa benza “malu mempe” adi ambuluisha bantu nabu mu nyuma ne mu mishindu mikuabu, badi batumbisha Nzambi ne disanka, kadi kabena baditumbisha buobu to.