Utu ne disanka dia kufila mapa anyi?

DIPA ntshintu tshipeshangana peshi makuta anyi diambuluisha didi muntu ta bantu kampanda bapesha muntu nansha bantu bakuabu. Muaku wa tshiena-Ebelu wa teru·mahʹ udi umvuija “dipa; tshitupa tshia tshijila; mulambu udibu bela mulu.” (Ekesode 25:2; Ekesode 29:27, NW, diumvuija kuinshi kua dibeji) Muaku eu mmufumine ku muaku wa pa muanda wa rum udi mu kabujima kawu umvuija ‘kuikala mûlu mule; kubandishibua; kuela mûlu’ (Yobo 22:12; 1 Samuele 2:1; Genese 14:22, MMM); udi kabidi mua kulua muaku wa pa muanda udi mua kumvuija ‘kuelesha [bu mudi dipa] mulu,’ tuambe ne: ‘kufila bintu.’​—Lewitiki 22:15.

Dipa didi mua kuikala anyi kupanga kuikala dia bintu bipesha muntu. Paulo wakela Nzambi tuasakidila bua dipa dia bena Kristo ba mu Filipoi dia muvuabu batue mudimu wa lumu luimpe nyama ku mikolo. Pa kumusha muvuabu baditue buobu bine mu diamba dia lumu luimpe, bavua kabidi bakuatshisha Paulo, pamuapa ne bantu bakuabu kabidi ne bintu, batua diamba dia lumu luimpe nyama ku mikolo ne lulamatu mushindu au.​—Filipoi 1:3-5; 4:16-18.

Bena Isalele bavua ne diakalenga dia kufila mapa bua kuibaka nzubu ya ntendelelu mulelela ne kupeta bintu bia kutekamu. Bakafila bintu bia kuasa nabi ntenta wa tshitendelelu (tabernakle) ne bia kutekamu (Ekesode 25:1-9; 35:4-9), kupeshabu ‘Yehowa kupa kuabu kua disanka’ e kubalombabu ne bua kuimanyika mapa abu, bualu bintu bivuabu bafile bikavua “bikumbane bua kujikija nabio midimu yonso; bivua mene bipite.” (Ekesode 35:20-29; 36:3-7, MMM) Mapa akafila Mukalenge Davidi bua diibaka dia ntempelo uvuabu bajinga kuasa avua a ‘bibutshilu’ biende bia or ne bia argent ya mushinga mupite pa dolare 1 202 000 000. Nunku, bamfumu ne tupitene tua bantu bakafila pabu ne disanka dionso or ne argent ya mushinga mupite pa dolare 1 993 000 000, kutentekapu ne biamu bia mitaku ne biamu bifike ne mabue.​—1 Kulondolola 29:1-9.

Mu matuku a Mukalenge Yoasha, bavua bateke kashete ku tshibuelelu tshia Nzubu wa Yehowa bua kupeta mapa a kukuatshisha nawu mudimu munenanenayi wa dilongolola dia ntempelo. Nunku bamfumu ne bantu bonso bavua basanka bua kuelamu mulambu wa “tshitadi tshia tshijila” tshivuabu mua kukolesha natshi nzubu wa Nzambi ne kuenza bintu bia kukuata nabi mudimu mu ntempelo.​—2 Kulondolola 24:4-14, NW.

Pavua Yezu Kristo ne bapostolo bende mu mudimu wa diyisha, bavua banyisha bintu bivuabu babapesha bua kubambuluisha. (Luka 8:1-3) Bena Kristo ba mu Makedonia ne mu Akaya bakadifila ne muoyo mujima bua kuambuluisha bana babu bavua mu dikenga, ‘basanka bua [kufila dipa] bua kukuatshisha nadi bapele ba munkatshi mua bansantu ba mu Yelushalema,’ babasangishila pamuapa makuta.​—Lomo 15:26.

Bungi bua bintu bidi muntu ufila bu dipa kabuena anu buleja ne bulelela buonso mudiye muena kalolo to. Dituku kampanda, Yezu Kristo uvua utangila muvua bantu bela makuta mu tushete tua tshibutshilu tuvua mu ntempelo. Babanji bakelamu makuta a bijanja a bungi, kadi tshiakakemesha Yezu mpakamonaye kalolo ka muoyo mujima ka mukaji mukamba mukuabu muena dikenga uvua muele anu tukuta tukese tua bijanja tubidi patupu tua mushinga mutambe bukese, e kuambaye ne: ‘Bintu biakuela mukaji eu mupele wa mu lufuila bidi bitambe biakuela bakuabu bonso, bualu bua buonso buabu bakuela bintu mu mushete biakadibu kabayi nabi bualu, bia pa mutu; kadi mukaji eu wakuela bintu biakadiye nabi bualu, bintu biende bionso bia kudia menemene.’ (Luka 21:1-4; Mâko 12:41-44) Paulo wakamba bua difila dia mapa bua kuambuluisha bana betu badi bakenga ne: “Paudi ne dijinga dikole dia kupa, [Nzambi] udi wanyisha tshiudi natshio; kena ukeba tshiudi kuyi natshio nansha.”​—2 Kolinto 8:12, MMM.

Nansha mudi muntu nansha umue kayi mua kuvuija Yehowa udi muena bintu bionso mubanji (1 Kulondolola 29:14-17), difila dia mapa mbualu bua disanka budi bupetesha mutendeledi wa Yehowa tshikondo tshia kulejaye ne: mmumunange. Mapa mafila kabiyi bua kudileja ku bantu anyi bua kipatshila kabi, tuambe ne: mafila ne meji mimpe ne bua kutantshisha ntendelelu mulelela adi apetesha muntu disanka ne mabenesha a kudi Nzambi. (Bienzedi 20:35; Matayo 6:1-4; Nsumuinu 3:9, 10) Muntu udi mua kupeta disanka edi pa kuikalaku udibutshila pa tshibidilu kantu ka ku bintu bidiye nabi bua kukuatshisha naku ntendelelu mulelela ne kufila diambuluisha kudi badi badikengela.​—1 Kolinto 16:1, 2.