Bua kuitaba malongesha a tshitendelelu mbimpe kuelela meji mavule anyi?
Mutangidi kampanda wa tulasa tua seminere tua malu a Nzambi mu États-Unis mmufunde ne: “Kudi batendeledi bapite bungi badi bitaba malongesha a bitendelelu biabu anu bua kuepuka dielangana dia meji. Mbasue kuikala ba-tshitaba mvinyingu kabayi bakeba bijadiki.”
MBUENA kuamba ne: bantu bavule badi bamba mudibu bitabe malongesha a ntendelelu kampanda kabatu batamba kunana meji bua kumanya tshidibu baitabile peshi bua kumanya bikala malongesha abu mikale malelela. Ki ntshianana padi bantu bavule kabatshiyi basue kuyikila kabidi malu a Nzambi nansha!
Diakabi, bilele bu mudi kutendelela ne bimfuanyi ne kuambulula masambila makuata ku muoyo bidi kabidi bipangisha bantu mua kuela meji bimpe. Pa kumbusha bilele ebi, tshidi bitendelelu bia bantu bavule menemene bitamba kuangata ne mushinga nnzubu mitambe bunene ya masambila, madidishi a mmuenu ya mekala ne misambu misheme ne ngoma. Nansha mudi bena mu bimue bitendelelu bamba mudi malongesha abu mikale a mu Bible, dilongesha diabu dia se: ‘itabuja Mukalenge Yezu usungidibue’ kadiena dikankamija bantu bua kulonga Bible ne muoyo mujima to. Bakuabu badi bayisha ne: bantu ba tshianana anyi bena tshididi badi mua kujikija ntatu idi pa buloba. Kadi ntshinyi tshidi bionso ebi bipatule?
Bua malu adi enzeka mu Amerike wa ku Nord, mufundi mukuabu wa malu a bitendelelu wakamba ne: “Buena-Kristo . . . budi buenda bushala anu bua pa mutu pa mutu, [ne] bantu badi babuitaba kabena nansha babalongesha dilongesha dia nsongo to.” Mukebuludi mukuabu wakafika too ne ku dibikila ditunga dia États-Unis ne: “nditunga dia bapangi ba Bible.” Bua kuamba bulelela, mêyi aa adi mua kukumbanyina kabidi matunga makuabu adi ne Buena-Kristo bua ku mishiku butule bupuwe. Bitendelelu bia bungi bidi kabiyi bia bena Kristo bidi pabi bipangisha bantu bua kuelangana meji, bitumbisha anu misambu, masambila ne mishindu kabukabu ya dinana meji idi mibuelakane ne malu a mîdima pamutu pa kuela meji mimpe adi akuatshishangana.
Pabi, buobu bantu bamuebamue aba badi kabayi basue kuela meji bua kujingulula bikala malongesha a tshitendelelu tshiabu majalame anyi malelela, batu misangu mivule bela meji a bungi bua malu makuabu a ku dituku ne ku dituku. Kabienaku bikukemesha bua kumona muntu udi wela meji a bungi mutantshi mule bua kusumba tshilamba kampanda tshia mushinga mu tshisalu, tshikalaye mua kuimansha dimue dituku paditshi tshisunsuka, wamba bua tshitendelelu tshiende ne: ‘Bu muvuatshi tshisankishe baledi banyi, tshidi tshinsankisha meme panyi’ anyi?
Bituikala basue menemene bua kusankisha Nzambi, katuenaku ne bua kukonkonona bimpebimpe bua kumanya bikala malu adi amutangila atudi bitabuje majalame peshi kaayi majalame anyi? Mupostolo Paulo wakakula bua bamue batendeledi ba mu tshikondo tshiende bavua ne ‘lukunukunu kudi Nzambi, kadi kaluyi lua [dimanya] dilelela.’ (Lomo 10:2) Tudi mua kufuanyikija bantu aba ne muntu udibu bangate bua kulaba mukubu ku nzubu kampanda ne udi wenza mudimu mukole bua kulaba mukubu ku nzubu eu, kadi udi ulaba mukubu wa mekala makuabu bua dipanga kuteleja tshivua muena nzubu mumuambile. Mulabi wa mukubu eu udi mua kuanyisha mudimu wende, kadi muena nzubu au neawanyishe pende anyi?
Ntshinyi tshidi Nzambi musue bua bidi bitangila ntendelelu mulelela? Bible udi wandamuna ne: ‘Bualu ebu budi buimpe ne mbudi Nzambi Musungidi wetu witabuja, udi musue bantu bonso basungidibue, bafike ku dimanya [dijalame] dia malu malelela.’ (1 Timote 2:3, 4) Bamue badi mua kuela meji se: kabena mua kupeta dimanya dia mushindu’eu mu bitendelelu bungi tshianana bidiku lelu’eu to. Kadi anji kuelabi meji: bikala Nzambi musue ne: bantu bafike ku dimanya dijalame dia bulelela, udi mua kubasokokadi anyi? Bible kêna ulongesha nanku to, bualu udi wamba ne: ‘Biwakeba [Nzambi], neumupete.’—1 Kulondolola 28:9.
Mmunyi mudi Nzambi udimanyisha kudi bantu badi bamukeba ne muoyo mujima? Tshiena-bualu tshidi tshilonda tshidi ne diandamuna dia lukonko elu.