Bukulakaje ki mbumupangishe bua kulonga to

KSENIYA wakaledibua mu 1897. Uvua ne bana ba bakaji basatu, wa balume umue, bikulu 15 ne bana ba bikulu bende 25. Katshia ku buana buende uvua wenza malu avua baledi bende bamulongeshe. Nansha muvuaye mu tshimuangi mu Moscou pakanyemaye mvita mu république wa Abkhazie (udi pankatshi pa Mbuu Mufike ne mikuna ya Caucase), uvua anu ne disanka bua malu avuaye muenze mu matuku ende a muoyo, nangananga bua tshivuaye ubikila ne: ntendelelu uvuaye mupiane kudi baledi bende.

Mu 1993, Meri muana wa bakaji wa Kseniya wakalua Ntemu wa Yehowa. Meri wakatuadija kuyikila ne mamuende Kseniya malu adi atangila Yehowa Nzambi ne Bible, kadi kavua musue kumuteleja to. Kseniya uvua anu wambila muanende wa bakaji eu ne: “Bukole bunkadi ebu tshiena mua kulonga malu makuabu to.”

Nansha nanku, muanende wa bakaji Meri, Londa mukaji wa muikuluende, ne Nana ne Zaza, bana ba bikulu bende bakavua balue bonso Bantemu ba Yehowa, bakatungunuka anu ne kumuambila malu a mu Bible. Dimue dituku ku dilolo mu 1999, bakabadila Kseniya mvese wakalenga mutshima wende. Mvese au uvua ne mêyi malenga a Yezu akambilaye bapostolo bende ba lulamatu pakabanjijaye Didia dia Dilolo dia Mukalenge. (Luka 22:19, 20) Dilolo adi, Kseniya wakangata dipangadika dia kubanga kulonga Bible nansha mukavuaye ne bidimu 102.

Kseniya udi wamba ne: “Kunyima kua meme mumane kulala panu bidimu 102, ngashishi kufika ku diumvua tshitudi bikadile ne muoyo. Mpindieu ndi mujingulule ne: kakuena tshintu tshimpe tshipite kusadila Yehowa Nzambi wetu mulenga ne wa dinanga to. Ntshidi anu mukazamuke ne ntshidi ne bukole bua mubidi. Ntshidi mbala mikanda tshiyi ntalatala ya mêsu, ne ndi ndisangisha ne dîku dianyi ne disanka.”

Kseniya wakatambula mu dia matuku 5 a ngondo wa Kasuabanga 2000. Udi wamba ne: “Mpindieu ndi mpesha Yehowa muoyo wanyi bua kumusadila ne dinanga. Ntu ngabanya bibejibeji ne trakte musombele ku njila muaba udi bantu bindila bise pabuipi ne ku nzubu kuanyi. Pa tshibidilu balela banyi batu balua kummona, ne ntu mbamanyisha ne disanka dionso bulelela budi butangila Yehowa.”

Kseniya mmuindile dituku dikala ‘munyinyi wa pambidi pende ne bua kupita wa muana bulengele, pikalaye mua kupingana ku matuku a bunsongakaji buende.’ (Yobo 33:25) Bikala mununu wa bidimu luama ne pamutu umona ne: bukulakaje ki mbumupangishe bua kulonga Bible bua kumanya tshitudi bikadile ne muoyo, wewe newambe tshinyi?