“Udi mukaji wa ngikadilu mimpe”

Mêyi aa ngakelabu nawu nsongakaji mukuabu muena Moaba kalumbandi. Uvua mukaji mukamba uvua ne dîna ne: Luta, mukaji wa muana wa Naomi mukaji muena Isalele. Luta uvua musombele mu Isalele kukadi bidimu bitue ku 3000, mu tshikondo tshivua balumbuluishi bakokesha, ne wakenda lumu luimpe. (Luta 3:11, MMM) Mmunyi muakafikaye ku dienda lumu luimpe lua nunku? Mbanganyi badi tshilejilu tshiende mua kuambuluisha?

Luta kavua ‘udia biakudia bia bufuba’ to, uvua wenza mudimu mukole munkatshi mua mêba mavule bua kupumbulula bia pa madimi, ke kumuelabu kalumbandi bua tshisumi tshivuaye natshi. Nansha pakalongololabu bua kumupepejila mudimu wende mukole, wakatungunuka ne kuenza mudimu bikole kupita ne pa bivua bikengedibua. Tshidi tshikemesha ntshia se: wakakumbanyina diumvuija dia mu Bible dia mukaji wa kutemba ku bantu, mukumbane, wa tshitembu ne muenji wa mudimu.​—Nsumuinu 31:10-31; Luta 2:7, 15-17.

Ngikadilu ya mu nyuma ya Luta, bu mudi didifila diende ne bupuekele ne dinanga diende dia lulamatu, ke malu manene akasaka bantu bua kumuanyisha. Luta wakashiya baledi bende ne ditunga diabu, kayi ne ditekemena dia kupeta disanka divua dibaka mua kumupetesha, wakalamata Naomi. Kabidi, Luta wakaleja dijinga dia kusadila Yehowa, Nzambi wa mamuenende. Bible udi uleja mushinga wende padiye wamba ne: uvua ‘mupite bana ba balume muanda-mutekete buimpe kudi [Naomi].’​—Luta 1:16, 17; 2:11, 12; 4:15.

Nansha mudi muyuki uleja ne: Luta uvua mukaji wa ngikadilu mimpe munkatshi mua bantu bavuaye usomba nabu, tshivua ne mushinga wa bungi ntshia se: Nzambi wakanyisha ngikadilu yende ne wakamupesha diakalenga dia kulua nkambua wa Yezu Kristo. (Matayo 1:5; 1 Petelo 3:4) Luta udi tshilejilu tshilenga ki ng’anu bua bakaji bena Kristo, kadi bua bantu bonso badi bamba mudibu batendelela Yehowa.