Kuikala muena muoyo-mutoke nkuimpe, kadi nkukumbane anyi?

KUIKALA muena muoyo-mutoke anyi muena malu malelela nkuanyishibue bushuwa mu nsombelu wetu wa matuku onso anyi? Kuikala muena muoyo anyi mutshima mutoke kudi kumvuija kubenga dishimakajangana anyi lubombo; kuikala muena malu malelela a patoke, muena malu malulame, nansha muena malu majalame. Bushuwa, kuikala ne ngikadilu eu kudi ne mushinga wa bungi bua kukolesha malanda mimpe ne bantu bakuabu. Mupostolo Paulo wakafila mubelu ne: ‘Mu malu onso nutumikile badi bamfumu benu ba mu malu a pa buloba; kanuenji mudimu bu bapika ba mêsu, bu basankishi ba bantu; kadi nuwenze ne mitshima mitoke nutshina Mukalenge.’ (Kolosai 3:22) Nnganyi udi kayi mua kusanka bua kuikala ne muntu muena malu malelela anyi wa muoyo-mutoke bu muena mudimu wende? Lelu’eu, bantu bena mutshima mutoke badi mua kupeta mudimu kakuyi lutatu ne kuulama bimpe.

Kadi, kuikala ne muoyo-mutoke kudi kulua kutambe buimpe bua padiku kulengeja malanda etu ne Nzambi. Bena Isalele ba kale bavua bapeta mabenesha a Nzambi pavuabu banemekela bimpe menemene mikenji ne bibilu bivua bibatekela. Pavua mupostolo Paulo wakula bua bukezuke bua tshisumbu, wakabela bena Kristo ne: ‘Tuikale tudia bidia bia disanka edi; katudîdi ne luevene lukulukulu, anyi luevene lua meji mabi ne lua malu mabi, kadi tudie bidia bidi kabiyi ne luevene, bia malu a patoke ne a bushuwa.’ (1 Kolinto 5:8) Bua Nzambi kuitabaye ntendelelu wetu, kuikala ne muoyo-mutoke kakuena anu kuanyishibue patupu, kadi kudi kabidi ne mushinga. Kadi, umanye ne: kuenza malu ne mutshima mutoke nkayaku ki nkukumbane to. Tudi ne bua kukumbajijaku bulelela.

Bantu bavua benze mazuwa manene a Titanic ne bena luendu bavua babuelemu bavua mua kuikala bele meji ne muoyo wabu wonso ne: mazuwa manene a pa mbuu a diambula bantu aa kaavua mua kudina to. Kadi, mu 1912 mu luendu luawu lua kumpala, mazuwa au akadituta ku dibue dinene dia mayi-makasa divua muinshi mua mâyi, bantu 1 517 kujimija mioyo yabu. Bena Yuda bakuabu ba mu bidimu lukama bia kumpala bavua mua kuikala bitabuje ne muoyo wabu mujima ne: mushindu wabu uvuabu batendelela Nzambi uvua muakane, kadi lukunukunu luabu kaluvua ‘lushindamene pa dimanya dilelela nansha.’ (Lomo 10:2, MMV) Bua Nzambi kutuitabaye, mbimpe malu atudi bitabuje ne mutshima umue ikale mashindamene pa malongesha malelela ne majalame. Bantemu ba Yehowa ba muaba uudi musombele nebikale ne disanka dia kukuambuluisha bua kukonkonona mushindu uudi mua kutendelela Nzambi ne muoyo umue ne mu bulelela.