Nkonko ya babadi

Kudiku bualu butudi mua kuenza bikala muanetu kampanda muela manyi udi kayi ne mushindu wa kuenda bua kubuela mu Didia dia Mukalenge anyi?

Eyowa. Tudi mua kuenza bualu kampanda bua kuambuluisha muanetu muela manyi udi mulema anyi udi usama ne kayi ne bukole bua kubuela mu Tshivulukilu tshia lufu lua Kristo pamue ne tshisumbu. Kasumbu ka bakulu kadi ne bua kulongolola bua mukulu umue anyi muanetu wa balume mupie mu nyuma atuadile muena Kristo nende eu amue mampa ne mvinyo bia bimanyishilu anu buine butuku bua Tshivulukilu abu, kumpala kua dîba kupatuka.

Bilondeshile nsombelu idiku, mukulu anyi muanetu mukuabu au udi mua kufila mumvuija makese ne kubala mvese miakanyine. Udi mua kulonda tshilejilu tshifila kudi Yezu pakabanjijaye Didia dia Mukalenge. Tshilejilu, udi mua kumubadila Matayo 26:26 ne kumupesha diampa didi kadiyi ne luevene kunyima kua disambila. Pashishe, udi mua kubala Matayo nshapita wa 26, mvese wa 27 ne wa 28, ne kunyima kua disambila udi mua kumupesha mvinyo. Udi mua kuamba mu mêyi makese tshidi diampa ne mvinyo biumvuija, ne kulua kuenza disambila dia ndekelu.

Bushuwa, tudi ne bua kudienzeja muetu muonso bua kuikalapu dîba didi tshisumbu tshisekelela Didia dia Mukalenge. Kadi tshia kuenza ntshinyi bikala muena Kristo muela manyi udi usama bikole, udi mu lupitadi, anyi udi ne bualu bukuabu bumupangishe bua kubuela mu Tshivulukilu pamue ne tshisumbu kunyima kua dibuela dia dîba mu dia matuku 14 a ngondo wa Nisana? Muela manyi eu neenze yeye nkayende Tshivulukilu kunyima kua matuku 30 bilondeshile tshilejilu tshifila mu Mikenji ya Mose.​—Nomba 9:9-14.