‘Solomo kakadi ne bilamba bilengele bu tshimue tshia ku bilongo ebi’
BILONGO bia mu mpata bu bitudi tumona mu dibeji edi ebi bitu ku mielelu ya njila ya bungi ya mu Afrike wa ku Sud. Batu babibikila ne: cosmos, ne mbifumine mu matunga a mu Amerike adi pankatshi pa tropique du Cancer ne tropique du Capricorne. Bilongo bilenga ebi bidi mua kutuvuluija dilongesha kampanda diakafila Yezu. Bantu ba bungi ba ku bavua bamuteleje bavua bapele, ne bavua baditatshisha bikole bua majinga abu a ku mubidi, bua biakudia ne bua bivualu.
Yezu wakakonka ne: ‘Bua tshinyi nudi nuditatshisha bua bilamba? Tangilayi mudi bilongo bia mu mpata bidiunda: kabiena bienza mudimu ne kabiena bikuma bilamba. Kadi ndi nnuambila ne: nansha Solomo ne buneme buende buonso, kakadi ne bilamba bilengele bu tshimue tshia ku bilongo ebi.’—Matayo 6:28, 29, MML.
Bantu batu bafile mumvuija a bungi pa bidi bitangila mushindu menemene wa bilongo bia mu mpata bivua Yezu muambe. Kadi Yezu wakatungunuka, yeye kufuanyikija bisonsa, wamba ne: ‘[Nzambi] udi uvuadika bisonsa, bidi lelu mu mpata, malaba babiosha. Nanku kêna mua kunuvuadika nuenu bantu bilamba bimpe bipite anyi? Kadi ditaba dienu ndikese be!.’—Matayo 6:30, Mukanda wa Mvidi Mukulu (Mishonyi, MMV).
Nansha mudi bilongo bia cosmos kabiyi bia mu Isalele, bidi bijadika dilongesha diakafila Yezu. Bilongo ebi bitu bilenga be nansha buobu babimuenene ku bule anyi pabuipi, ne bakuatshi ba foto bazodi batu babisue bikole. Bushuwa, Yezu wakambilamu pakalejaye ne: ‘Solomo kakadi ne bilamba bilengele bu tshimue tshia ku bilongo ebi.’
Mêyi aa adi atulongesha tshinyi lelu’eu? Aba badi basadila Nzambi badi ne bua kuikala bajadike ne: neabambuluishe bua kupeta bintu bia kudiambuluisha nabi nansha mu ntatu. Yezu wakamba ne: ‘Kebayi bukalenge [bua Nzambi], nebanupe bintu ebi [bu mudi biakudia ne bilamba].’ (Luka 12:31) Bushuwa, mabenesha mavule adi afumina ku dikeba dia Bukalenge bua Nzambi. Kadi udi mumanye tshidi Bukalenge bua Nzambi bumvuija ne tshikalabu mua kuenzela bantu anyi? Bantemu ba Yehowa nebikale ne disanka dia kukuambuluisha bua wewe kupeta mandamuna a nkonko eyi mu Bible.