“Bantu babidi bakakokola ku tshibi tshietu”

“KUKADI bidimu bibidi katshia tuapeta dibungama bua lufu lua muana wetu wa bakaji utshivua mutekete.” Ke mushindu wakabangisha mukanda kampanda mupatula mu tshikandakanda tshia Le Progrès, tshitubu bapatula mu tshimenga tshia Saint-Étienne mu ditunga dia France.

“Mélissa uvua ne ngondo isatu ne uvua muledibue tshileyaleya. Bitu bikole bua kupeta menemene disulakana kunyima kua bualu bubi bua mushindu eu. Nansha mutuvua bakolele mu ekeleziya wa Katolike, bualu bumue buvua bututonda bikole; tuvua tuamba ne: ‘Nzambi, wewe muikaleku, bua tshinyi udi ulekela malu a mushindu eu enzeka?’” Mbimueneke ne: mamu uvua mufunde mukanda eu uvua ne kanyinganyinga kakole ne udimona kayi dikuatshisha.

Mukanda wende udi utungunuka ne: “Matuku makese kunyima kua malu aa, bantu babidi bakalua kukokola ku tshibi tshietu. Diakamue meme kumona ne: bavua Bantemu ba Yehowa. Nkavua musue kubenga ne bukalanga bua kuyukila nabu, kadi meme kumona broshire uvuabu bampesha. Uvua umvuija tshidi Nzambi mulekele makenga. Nanku ngakangata dipangadika dia kubabueja mu nzubu ne lungenyi lua kubaleja ne: bavua mu dipanga. Mvua mmona ne: bua makenga, dîku dianyi dikavua diamona mapite bungi ne bitukavua bumvue bamba bu mudi: ‘Nzambi wakatupeshaye, ne Nzambi wakamuangata’ bikavua bikumbane. Bantemu bakashala dîba dijima ne minite pa mutu. Bakanteleja ne luse lua bungi, ne pakayabu ngakadiumvua bimpe kupita mumvua kumpala ne ngakitaba bua balue kuntangila tshiakabidi. Kukavua bidimu bibidi katshia bualu abu buenzeka. Tshiena mulue Ntemu wa Yehowa to, kadi ngakatuadija kulonga nabu Bible, ne ntu mbuela mu bisangilu biabu misangu yonso padiku mushindu.”