Diambuluisha dia bushuwa bua bapele

PAVUA Yezu Kristo Muana wa Nzambi pa buloba apa, wakaleja dinanga dia bushuwa pavuaye wambuluisha bapele. Muntu mukuabu uvuapu pakenzeka malu aa wakamba bua mudimu wa Yezu ne: ‘Bafofo badi batabala, balema badi benda, bena nsudi badi balengejibua, bena mapapa badi bumvua, bafue badi babishibua ku lufu, badi bambila bapele lumu luimpe lua Nzambi.’ (Matayo 11:5) Kadi netuambe tshinyi bua bantu bungibu badi bikale bapele lelu? Kudiku lumu luimpe lua kubambila pabu anyi? Eyowa, kudi mukenji wa ditekemena wa kubambila!

Nansha mutu bantu bonso balengulula bapele ne babapua muoyo, Bible, Dîyi dia Nzambi, udi ulaya ne: ‘Kabena bapua [bapele] muoyo tshiendelele, ne ditekemena dia badi ne mitshima mipuekele kadiena dijimina kashidi.’ (Musambu 9:18) Mêyi aa adi akolesha ku muoyo neakumbane pikala Bukalenge bua Nzambi (anyi mbulamatadi mulelela wa mu diulu) mua kupingana pa muaba wa mamfumu onso a bantu. (Danyele 2:44) Bu mudiye Mukalenge wa mbulamatadi wa mu diulu, Yezu ‘neafuile udi mutekete ne udi [mupele] luse, neasungile mioyo ya [bapele]. Neapikule mioyo yabu ku tshinyangu ne malu makole, ne mashi abu neikale tshintu tshia mushinga mukole ku mêsu kuende.’​—Musambu 72:13, 14.

Mmalu kayi ikalaku pikala Kristo ukokesha pa buloba? Bantu bikala ne muoyo mu bukokeshi bua Kristo pa buloba bujima nebasanke bua mamuma a mudimu wabu. Bible udi wamba mu Mika 4:3, 4 ne: ‘Nebashikame, muntu ne muntu, muinshi mua muonji wende wa tumuma tua mvinyo ne muinshi mua mutshi wende wa mfigi; kakuena muntu wabakuatshisha buôwa; bualu bua mukana mua Yehowa wa misumba muakuamba nunku.’ Bukalenge bua Nzambi nebujikije mene ntatu ya masama ne lufu. (Yeshaya 25:8) Mbukua-panu kayipu bushilangane buikalaku! Tudi mua kuitaba milayi eyi ya mu Bible bualu Nzambi nkayende ngudi muyifundishe.

Pa kumbusha ditupesha mukenji wa ditekemena, Bible udi utuambuluisha bua kujikija ntatu ya ku dituku dionso bu mudi lua kubenga kudimona ne mushinga nansha mukese, ludi bupele mua kuikala bukebeshe. Dilonga dia Bible ndiambuluishe muena Kristo udi muikale mupele bua kumanyaye ne: udi ne mushinga ku mêsu kua Nzambi anu mudi nawu muena Kristo udi muikale mubanji. Mukanda wa Yobo udi wamba ne: Nzambi ‘[kêna] ubala babanji ne: badi kumpala kua bapele; bualu bua buonso buabu badi mudimu wa ku bianza biende.’ (Yobo 34:19) Nzambi mmubanange buonso mushindu wa muomumue.​—Bienzedi 10:34, 35.