‘Nzambi katu wikala mu ntempelo idi mibaka ku bianza bia bantu’
KAKUYI mpata, mupostolo Paulo uvua mumanye bimpe ntempelo ya nzambi-mukaji Atena, bualu ntempelo eyi ivua mu bimenga bia bungi bivuaye mupitshile mu ngendu yende ya bu-misionere. Bilondeshile tshibungu kampanda, Atena uvua mumanyike bikole bu nzambi-mukaji wa mvita ne meji, ne kabidi “wa midimu ya bianza ne dikeba ne meji bikondo bia ditalala mu kabujima.”—The Encyclopædia Britannica
Ntempelo wa Atena uvua mutambe kuenda lumu uvua Parthénon, ntempelo uvua muibaka mu Atena, tshimenga tshivua tshibikidibua ku dîna dia nzambi-mukaji eu. Bavua bangata ntempelo wa Parthénon bu umue wa ku ntempelo minene ya kale. Munda muende muvua lupingu lua Atena lua metre 12, luenza ne or ne mubanga. Pakalua Paulo mu Atena, ntempelo eu uvua muenza ne mabue a marbre ke uvua muenze matuku a bungi mu tshimenga atshi bualu ukavua muibaka bidimu bitue ku 500 bimane kupita.
Paulo muimane kumpala kua ntempelo wa Parthénon, wakayisha tshisumbu tshia bantu ba mu Atena bualu bua ‘Nzambi udi kayi wikala mu [ntempelo] mibaka ku bianza bia bantu.’ (Bienzedi 17:23, 24) Imue misangu bulenga bua ntempelo wa Atena anyi bunene bua lupingu luvuamu alu bivua bimuvuija munene bikole kupita Nzambi uvua kayi umueneka uvua bateleji ba Paulo kabayi bamanye. Kadi anu muvua Paulo mubileje, katuena ne bua kuela meji ne: Mufuki wa bantu ‘udi bu ngolo, anyi argent, anyi dibue, [anyi tshintu] tshidi tshisonga ne meji a bantu’ to.—Bienzedi 17:29.
Nzambi ne nzambi-mikaji bu Atena ivua ne butumbi bualu bua ntempelo ne mpingu ivuaku ne pashishe kujiminayi. Lupingu lua Atena luakajimina mu ntempelo wa Parthénon mu bidimu nkama inayi mu bikondo bietu ebi, ne anu bishadile bia mikese ya ku ntempelo ya nzambi-mukaji eu ke itshidiku lelu. Lelu wa ndaya eu, nnganyi utshidi ukeba meji ne bulombodi kudi Atena?
Mbishilangane bikole menemene ne Yehowa, “Nzambi wa tshiendelele” udi muntu nansha umue kayi muanji kumona. (Lomo 16:26; 1 Yone 4:12) Bana ba Kola bakafunda ne: ‘Eu udi Nzambi, Nzambi wetu too ne tshiendelele. Yeye neikale mulombodi wetu too ne patuafua.’ (Musambu 48:14) Umue mushindu udi Nzambi mua kutulombola nkulonga Bible Dîyi diende ne kutumikila mibelu idimu mu nsombelu wetu.