Mmu mishindu kayi mudi basadidi ba Nzambi bikale bu mitshi?
MUFUNDI wa Misambu wakamba bua muntu udi ne disanka diende mu mikenji ya mu Bible ne udi uyitumikila mu nsombelu ne: ‘Udi bu mutshi wakukunabu ku kala kua misulu ya mâyi, udi ukuama mamuma au mu tshidimu tshiawu; dibeji diawu kadiena difubidila. Malu onso adiye wenza adi atuta diakalengele.’ (Musambu 1:1-3) Bua tshinyi difuanyikija dia muntu ne mutshi edi ndikumbane?
Mitshi idi mua kulala bidimu bipite bungi. Tshilejilu, badi bamba ne: imue mitshi ya olive ya luseke lua ku Mbuu wa Mediterane ikadi mienze bidimu tshinunu anyi binunu bibidi. Bia muomumue, mitshi ya baoba ya mu Afrike wa pankatshi itu ilala bidimu bipite bungi, kabidi bantu badi bajadika ne: mitshi ya pin ya mu Californie (États-Unis) ikadi milale bidimu bu 4 600. Mu dîtu, mitshi minene itu misangu mivule diambuluisha dinene kudi bintu bionso bidi pabuipi nayi. Tshilejilu, mitshi mile itu ifila dileji bua kukuba tuana tua mitshi, ne mabeji ayi atu amata atu afukisha buloba.
Pa tshibidilu mitshi itu mipite bule itu ikolela kaba kamue mu mêtu, muaba udi mutshi ne mutshi mua kuambuluishangana ne mukuabu. Bu mutu miji yayi pamu’apa mibuelakanangane, mitshi mivule idi mua kukandamena tshiapamue tshipepele tshikole bimpe bitambe, bishilangane ne mutshi udi muikale pa nkayawu munkatshi mua mpata. Kabidi miji ya bungi idi nayi mutshi idi iwambuluisha bua kukokawu mâyi ne bufuke bukumbane mu buloba. Imue misangu, miji idi mua kubuela muinshi menemene mua buloba, bule buayi kupite ne bua mutshi muine, anyi idi mua kualabala bikole mu buloba ne kupita ne bule bua muaba udi matamba a mutshi mashikidile.
Mupostolo Paulo uvua pamu’apa wela meji bua mutshi pavuaye muambile bena Kristo ne: ‘Nuikale nuenda mu Kristo, nuikale ne miji yenu miedibue ne miashibue munda muende ne nujadikibue mu ditabuja.’ (Kolosai 2:6, 7) Bushuwa, bena Kristo badi mua kushala bashindame mu ditabuja diabu anu bobu mua kuela miji mu Kristo bikole menemene.—1 Petelo 2:21.
Kadi mmu mushindu kayi mukuabu mudi basadidi ba Nzambi mua kufuanangana ne mitshi? Anu bu mutu mitshi idi tshisumbu mikale ikuatshishangane ne idi kumpenga kuayi, bia muomumue bonso badi bashala balamate tshisumbu tshia bena Kristo badi bapeta diambuluisha kudi bena Kristo nabu. (Galatia 6:2) Bena Kristo ba lulamatu bakadi bapie, bamane kuela miji ya mu nyuma mile midialabaje badi bambuluisha bena Kristo bapiabapia bua kushalabu bashindame mu ditabuja nansha padibu kumpala kua buluishi bukole bufuane mvula wa tshipepele tshikole. (Lomo 1:11, 12) Bena Kristo bapiabapia badi mua kuenza anu bu badi basampila bimpe muinshi mua “dileji” dia bukubi dia basadidi ba Nzambi bakadi bamonemone malu bikole. (Lomo 15:1) Bualu bukuabu: bonso badi mu tshisumbu tshia bena Kristo tshia buloba bujima badi bapeta biakudia bia mu nyuma bidi bikolesha bifumine ku “mitshi minene ya buakane,” mbuena kuamba ne: bashadile bela manyi.—Yeshaya 61:3, NW.
Bidi bimpe bua basadidi bonso ba Nzambi bikale ne ditekemena dia kumona muabakumbanyina mulayi udi mu Yeshaya 65:22 eu: “Bu mudi matuku a muoyo wa mutshi mbu mudi matuku a bantu banyi.”
[Mêyi a dianyisha bua tshimfuanyi mu dibeji 28]
Godo-foto