‘Nukebe bantu bimpe’

DAMASEKE tshivua tshimenga tshia bubanji bua bungi mu bidimu lukama bia kumpala bia mu bikondo bietu ebi. Bu muvuatshi tshinyunguluka kudi mpata ya mitshi ya bimuma, tshimenga etshi tshivua bu muaba wa tshitalela uvua bangenda bavua bafumina mu matunga a ku esete balua kuikishila. Matuku makese kunyima kua lufu lua Yezu Kristo, bakenza tshisumbu tshia bena Kristo mu Damaseke. Munkatshi mua bantu bavuamu muvua bena Yuda bavua pamu’apa balue bayidi ba Yezu mu tshikondo tshia difesto dia Pentekoste diakenzeka mu Yelushalema mu 33 bikondo bietu ebi. (Bienzedi 2:5, 41) Bamue bayidi bavua mua kuikala banyemene mu Damaseke pakabangabu kubakengesha kunyima kua bamane kushipa Stefano ne mabue.​—Bienzedi 8:1.

Pamu’apa mu 34 bikondo bietu ebi ke tshikondo tshivua muena Kristo mukuabu wa ku Damaseke diende Anania mupete mudimu wa pa buawu. Mukalenge wakamuambila ne: ‘[Juka] biebe, uye ku njila wa musoko udibu babikila ne: Mululame, ku nzubu wa Yuda, ukonkeku muntu dîna diende Shaula, udi biende Muena Tâso, bua tangila, yeye udi [usambila] Nzambi.’​—Bienzedi 9:11.

Njila eu uvuabu babikila ne: Mululame uvua wa bule bua kilometre bu umue ne tshitupa ne uvua upitshila munkatshi mua tshimenga tshia Damaseke. Tshimfuanyi tshidi muaba eu tshia mu lukama lua bidimu lua 19 tshidi tshituambuluisha bua kupeta lungenyi lua tshivua njila au mu bikondo bia kale. Bua mushindu uvuabu benze njila au, Anania uvua ne bua kuikala mukebe mutantshi bua kupeta ku nzubu kua Yuda. Nansha nanku, Anania wakapeta muaba uvua nzubu au ne difikaku diende diakambuluisha Shaula bua kuluaye mupostolo Paulo, muambi wa lumu luimpe wa lukunukunu.​—Bienzedi 9:12-19.

Yezu ukavua mutume bayidi bende ne mubambile bua ‘kukeba bantu bimpe’ badi bakanyine lumu luimpe. (Matayo 10:11) Mbimueneke patoke se: Anania wakakeba Shaula. Anu bu Anania, Bantemu ba Yehowa badi bakeba bantu bimpe ne kabidi badi basanka bikole padi bantu aba bitaba lumu luimpe lua Bukalenge bua Nzambi. Dibapeta nunku didi dileja ne: bivua bia mushinga bua kubakeba.​—1 Kolinto 15:58.

[Tshimfuanyi mu dibeji 32]

‘Njila udibu babikila ne: Mululame’ lelu

[Mêyi a dianyisha bua tshimfuanyi mu dibeji 32]

Tshiangatshila mu mukanda wa La Tierra Santa, Volime II, 1830