Netupetaku dimue dituku bupole bua bushuwa anyi?

BANTU batu basue kumona mudi bana banaya ne baledi babu badi babanange. Bana batu banaya ne baledi babu nunku batu badimona mu bupole bualu baledi babu mbabalame bimpe. Kadi bua bana ba bungi, bikondo bia mushindu’eu bitu bimueneka anu mu mpukampuka. Bamue bana batu bakengakana dituku dionso edi bua kupeta muaba wa kulala. Kudiku ditekemena kampanda bua bana aba badi kabayi ne muaba wa kulala ne bakuabu bantu badi kabayi mu nsombelu muimpe anyi?

Nansha mudi matuku atshilualua mua kumueneka bu adi kaayi mimpe, Dîyi dia Nzambi didi ditupesha ditekemena. Muprofete Yeshaya ukavua mumanyishe ne: dituku nedilue dikala bantu bonso mua kusomba mu bupole. Wakafunda ne: ‘Nebase nzubu, nebashikamemu; nebatentule tumuma tua mvinyo mu madimi, nebadie tumuma tuayi. Kabena basa nzubu bua mukuabu abuelemu; kabena bakuna bintu bua mukuabu abidie.’​—Yeshaya 65:21, 22.

Kadi ditekemena edi didi ne bishimikidi anyi? Mu bulelela, muaku “ditekemena” nkayawu kawena uleja dishindika to. Tshilejilu, mu ditunga dia Brésil bantu batu misangu mivule bumvua mêyi aa: “A esperança é a última que morre.” Mmumue ne: “Ditekemena ntshintu tshia ndekelu tshidi tshifua.” Ebi bidi biumvuija ne: bantu ba bungi batu anu bashala ne ditekemena nansha padi ditekemena edi kadiyi ne nshindamenu wadi. Kadi ditekemena didi Nzambi wa muoyo utupesha ndishilangane. Mupostolo Paulo wakafunda ne: ‘Witabuja [Nzambi] kêna ufuishibua bundu.’ (Lomo 10:11) Milayi ya mu Bible ikadi mikumbane idi itupesha dishindika dia se: milayi mikuabu yonso ya Yehowa Nzambi idi kayiyi mianji kukumbana neyikumbane kabidi. Pakumbana milayi ayi, malu adi enzeja bana bua kuya kusombela mu tshisalu anyi mu njila nealue malu a kale.

Nansha lelu’eu, mibelu mimpe ya mu Bible idi mua kuambuluisha bantu badi batekete mu mikolo bua kulengeja nsombelu wabu ne kupeta bupole bua bushuwa. Mmunyi mudibi mua kuenzeka nanku? Bantemu ba Yehowa ba muaba uudi musombele nebikale ne disanka dia kukuambuluisha bua wewe kupeta diandamuna dia lukonko elu.