“Ntshinyi tshidi tshikuambuluishe?”

LUKONKO elu luvua luela Muriel (mamu wa bana basatu) kudi mukulumpe mukuabu mu restoran. Muriel uvua mutambakane bikole ne bana bende kudi baminganga ne dîba dikavua dipite. Kabatshivua ne dîba nansha dikese dia kupingana ku nzubu bua kudia dilolo adi kumpala kua kuyabu mu bisangilu biabu bia bena Kristo to. Nunku wakaya ne bana bende mu restoran uvua pabuipi apu bua kuelabu tshianza mukana.

Pakavuabu bajikija kudia, muntu mukuabu wakasemena pabuipi ne Muriel, kumuambila ne: “Ndi mushale munutangile katshia nuafika muaba eu. Ndi mumone dishilangana dinene pankatshi pa bana bebe ne ba bantu bakuabu batu balua muaba eu pa tshibidilu. Udi mua kumona mudi bana banyanga mesa ne nkuasa. Bateka makasa abu pa mesa, ne batonkola nkuasa. Kadi bebe bana badi anu bapuwe vii ne badi ne ngikadilu mimpe. Ntshinyi tshidi tshikuambuluishe?”

Muriel wakamuandamuna ne: “Meme ne bayanyi tutu tulonga Bible ne bana betu pa tshibidilu ne tutu tuditatshisha bua kutumikila bitudi tulonga mu nsombelu wetu. Tudi Bantemu ba Yehowa.” Ke muntu au kuamba ne: “Ndi muena Yuda ne mvua mupanduke ku Dishipangana dinene. Ntshidi muvuluke mushindu uvuabu bakengesha Bantemu ba Yehowa mu ditunga dia AIlemagne. Nansha mu tshikondo atshi bavua anu bashilangane ne bantu bakuabu. Bushuwa ngikadilu ya bana bebe mminkemeshe bikole. Ndi ne bua kukonkonona bimpe malu a tshitendelelu tshienu.”

Bible udi ufila mibelu mitambe buimpe mu dikolesha dia bana. Bantemu ba Yehowa badi baditatshisha bikole bua kuambuluisha bantu bakuabu bua bapete mibelu eyi idi ifuma mu Bible. Tudi tukubikila ne disanka dionso bua kulonda tshidibu bakulomba kuinshi eku.