Difutu dia luendu lule

MU République démocratique du Congo, mbatulondele bualu bua bana betu ba bakaji babidi bena muntu bavua benze luendu lule mu tshitupa tshivua mvita bua kuya kubuela mu Mpungilu wa Distrike wa “Tutumbishayi Nzambi” uvua muenzekele ku luseke lua Lisala. Pa kumbusha malu a mu nyuma avuabu ne bua kumvua ne didisangisha pamue ne bena Kristo nabu mu mpungilu au, bana betu aba bavua batekemene bua kupetangana ne baleji mpala ba ku biro bia filiale bia Bantemu ba Yehowa bidi ku Kinshasa. Bu muvua bena ditunga bikale anu baluangana mvita, kukavua kupite bidimu bia bungi bivuabu kabayi bamone nansha umue wabu ne bavua basue bua kupetangana nabu musangu eu.

Bana betu ba bakaji babidi aba bakangata buatu ne kuenzabu luendu lule lua kilometre mitue ku 300 kumbukila kuabu ku Basankusu batangile ku Lisala. Bakalonda misulu ibidi idi ipitshila mu dîtu, bobu kuenza mbingu isatu bua kufika ku Lisala. Bu mudibu bonso babidi mu mudimu wa ku dîba ne ku dîba (eu muenze bidimu 3 ne mukuabu bidimu 19), kabakapitshisha dîba patupu mu luendu luabu to, kadi bakamanyisha lumu luimpe lua Bukalenge. Bakenza mêba 110 benda bayisha bantu bavuabu bapetangana nabu mu luendu, kubashilabu trakte 200 ne bibejibeji 30.

Bakapita imue miaba mu musulu ivua nguvu ne ngandu, nyama itu imueneka bikole mu tshitupa atshi. Pavua dîba dibuela, kakuvua mushindu wa kuenda pa musulu butuku to. Bakapitshila kabidi miaba ya bungi ivua basalayi bajike njila.

Kadi nansha muvua luendu elu lule ne lutshiokesha bikole, bana betu aba bakasanka bua muvuabu bende nunku. Bonso babidi bakanyisha ne bakasanka bikole bua kubuela mu mpungilu wa ku Lisala. Mitshima yabu ivua miûle tente ne musangelu bua bulelela, ne dikala pamue ne bana babu 7 000 ba balume ne ba bakaji diakabakankamija. Kunyima kua mpungilu eu, bakapetangana ne ntatu ya muomumue mu dipingana ku mabu kuakasanganabu bena mêku abu bimpe kabayi ne bualu.