Bakabakengesha kumpala, kubakidilabu pashishe

KUKADI bidimu ndambu, Santiago ne mukajende Lourdes bakaya mu tshimenga tshimpe tshia Huillcapata, mu ditunga dia Pérou bua kumanyisha benamu lumu luimpe. Kadi matuku makese pashishe, nsaserdose muena Katolike wakafuma mu tshimenga tshia Cuzco ne wakasangisha bantu bonso ba mu tshimenga. Nsaserdose eu wakabambila ne: dilua dia Bantemu ba Yehowa mu tshimenga divua ne bua kubatuadila masama ne neje ya bungi ivua ne bua kushipa bimuna ne kunyanga bia pa madimi.

Bantu ba bungi bakitaba “mulayi” eu, bualu munkatshi mua ngondo mipite pa isambombo muntu nansha umue mu tshimenga atshi kakitaba bua kulonga Bible ne Santiago ne Lourdes to. Dimue dituku mene, Miguel tshindondi tshia ngovena wakipatangana ne Santiago ne Lourdes mu njila, wenda ubasa mabue. Kadi bobu bavua amu ne ditalala, ne ngikadilu mimpe ya bena Kristo.

Kadi kunyima kua matuku, bamue bantu bakitaba bua kulonga Bible. Nansha Miguel wakashintuluka. Wakatuadija kulonga ne Santiago, kulekelaye bunuavi ne kuluaye muntu muimpe. Pashishe, Miguel, mukajende ne babidi ba ku bana bende ba bakaji bakitaba bulelela.

Lelu’eu, kudi tshisumbu tshia Bantemu ba Yehowa tshidi tshienda tshidiunda mu tshimenga etshi. Miguel udi ne disanka bua muvua mabue a bungi avuaye muase Santiago ne Lourdes kaayi mabapete ne udi ne dianyisha dia bungi bua tshilejilu tshiabu tshimpe.

[Bimfuanyi mu dibeji 32]

Nsombelu wa ditalala wa Santiago ne Lourdes (kuulu) wakasaka Miguel (ku dia balume) bua kushintuluka