“Mvese ya mu Bible yakafundabu pa bintu bia kale menemene bidi bimanyike”
KUKADI bidimu 25 katshia bakebuludi ba bintu bia muinshi mua buloba ba mu ditunga dia Israël bapeta tshintu tshia dikema. Bakapeta mu lukita kampanda luvua ku mpenga kua Tshibandabanda tshia Hinoma mu Yelushalema tumivungu tubidi tua tshiamu tshia argent bafundepu mvese ya mu Bible. Tumivungu atu tuvua tufunda kumpala kua bena Babulona kubutulabu Yelushalema mu 607 kumpala kua bikondo bietu ebi. Bavua bafundepu amue mabenesha adi mu Nomba 6:24-26. Dîna dia Nzambi Yehowa divua miaba ya bungi mu tumivungu tubidi atu. Mbaleje ne: tumivungu atu ke “bintu bia kale menemene bidibu bafundapu mvese ya mu Bible wa mu tshiena-Ebelu.”
Kadi bamue bamanyi ba malu a Bible bakamba ne: mivungu ayi ivua mifunda mu bidimu bia lukama ne pa mutu kumpala kua bikondo bietu ebi. Badi babenga bualu foto ya tumivungu etu ivuabu bakuate kumpala kayivua mikumbane bua kukonkonona malu onso bimpe to. Bua kujikija tshilumbu tshia dîba divuabu bafunde tumivungu etu, kasumbu ka bamanyi kampanda kakabanga kulonga paku tumivungu etu. Bakenza mudimu ne ngenzelu mipiamipia ya dikuata bimfuanyi ne ya ordinatere bua kupatula bimfuanyi bidi bimueneka bimpe. Mbapatule bipeta bia dikonkonona edi matuku adi panshi aa. Kasumbu ka bamanyi nkapete tshinyi?
Tshia kumpala, bamanyi mbaleje ne: malu a muaba uvuabu bapete tumivungu atu adi aleja ne: ntua kumpala kua diya dia bena Isalele mu bupika mu Babulona. Dilonga dia bintu bivuabu bafunde kale (dikeba mua kumanya tshikondo tshia bintu ku diambuluisha dia mushindu udi maleta, mfundilu wa maleta, muaba wa kuelela tufulu pa maleta ne mushindu wa kutuela) didi dileja tshikondo tshimue atshi tshia ku ndekelu kua bidimu bia 600 kumpala kua bikondo bietu ebi. Pashishe, kasumbu kamane kutangila mfundilu wa miaku, kakamba ne: “Mfundilu wa miaku idi mu tumivungu udi umvuangana ne bijadiki bia bintu bia kale bidibu bangule ne dilonga dia mfundilu wa bintu bia kale pa bidi bitangila dîba divuabu batufunde.”
Tshikandakanda kampanda tshidi tshilonda mu tshikoso dikonkonona dia tumivungu tua argent etu (tudibu babikila kabidi ne: mifundu ya Ketef Hinnom) tshiamba ne: “Nunku, tudi mua kuambulula malu adi bamanyi ba bungi bafike ku dipeta ne: malu adibu bafunde pa tumivungu etu adi ne mvese ya mu Bible yakafundabu pa bintu bia kale menemene bidi bimanyike.”—Bulletin of the American Schools of Oriental Research.
[Mêyi a dianyisha bua bimfuanyi mu dibeji 32]
Nyongolo: Pictorial Archive (Near Eastern History) Est.; mifundu: Photograph © Israel Museum, Jerusalem; ne dianyisha dia Israel Antiquities Authority