‘Kamanyinu kakunzubile ka matumba asatu kadi kumvuija tshinyi?’
TATU mukuabu udi wenza mudimu mu tshibambalu tshia malu a bu-ndumbulula mu tshimenga tshia Séoul (mu ditunga dia Corée) wakafunda ne: “Kukadi matuku makese, Ntemu wa Yehowa kampanda uvua mumpeshe tshibejibeji tshia Tshibumba tshia Nsentedi. Pangakatshibala, ngakamona mushindu uvua bena tshididi tshia bena Nazi ne tshia ba-Koministe bakengeshe Bantemu ba Yehowa. Kadi ndi ne lukonko. Pa tshizubu padi foto wa Bantemu ba Yehowa bikala ne kamanyinu kakunzubile ka matumba asatu katelela ku dia bakaji dia nkotshi yabu. Kamanyinu aka kakunzubile kadi kumvuija tshinyi?”
Pavua bena Nazi bakokesha mu Allemagne, Bantemu ba Yehowa bavua babenga bua kukosela Hitler mpala ne kuamba ne: Heil Hitler. Bavua kabidi babenga kubuelakana mu malu a tshididi ne mu busalayi. Ke bualu kayi bena Nazi bavua babakengesha ne tshikisu tshikole. Bakakosela Bantemu batue ku binunu 12 tshibawu tshia buloko bua matuku mashilangane ne kuelabu bakuabu mu tumponyi tua dikengeshila bantu. Bantemu batue ku binunu 2 bavuabu bakuate bakafua, ne bavua bashipa ba bungi ba kudibu.
Kadi kamanyinu kakunzubile ka matumba asatu kavua pa bilamba bivuabu babapeshe mu buloko kadi kumvuija tshinyi? Mukanda kampanda udi umvuija ne: “Bisumbu bia bantu bishilangane bivua [bena Nazi] bakuata bivua ne tumanyinu tuvua tubasunguluja ne bikuabu. Kumpala kua mvita, bena Nazi bakabueja tshilele tshia kutelela kamanyinu kampanda pa bilamba bia bena buloko bilondeshile tshisumbu ne tshisumbu. Tshilejilu, bena malu a tshididi bavua ne kamanyinu kakunze; Bantemu ba Yehowa ne kakunzubile (anyi viole); bavua batombokela malu a mu ditunga ne kafike; bashipianganyi ne ka mâyi a matamba; bantu badi balala ne balume nabu anyi bakaji nabu ka dikala dikunze ne ditoke bisambakaja (anyi roze); ne bua bavua bajinga kumuka mu ditunga ka mubidi wa diulu (anyi bule). Bena Yuda bavua babasakidila bobu kamanyinu ka manyimanyi (anyi ka kalabi) pa kakuabu bua kuenzabi tshipapu tshia matumba asambombo tshivuabu babikila ne: Mutoto wa Davidi.”—Anatomy of the SS State.
Mulongeshi John Roth mmufunde ne: “Bantu ba miaba yonso bobu balongele ku tshidi kamanyinu kakunzubile ka matumba asatu kaleja pa bidi bitangila dilonda malu makane, nebituepule ku njiwu ya kuenza malu mabi mu bidimu bidi kumpala ne nebituambuluishe bua kuenza malu adi matambe buimpe.” (Holocaust Politics) Bantemu ba Yehowa mbapatule bande wa video wa La fermeté des Témoins de Jéhovah face à la persécution nazie ne mbapete difutu dinene bua bande wa video eu. Lomba Ntemu wa Yehowa kampanda bua umone pebe bande eu.