Nkonko ya babadi

Ntshinyi tshidi muntu udi bademon bakengesha mua kuenza bua kumbuka ku bukokeshi buabu?

Dîyi dia Nzambi didi dileja ne: kudi mushindu wa muntu udi bademon bakengesha kumbukaye ku bupika buabu. Disambila didi ne mushinga wa bungi. (Mâko 9:25-29) Kadi kudi makuabu malu adi muntu ne bua kuenza. Tshivua tshienzeke kale tshidi tshileja malu makuabu adi akengela kuenza.

Bamue bantu ba mu Efeso bavua babuelakane mu malu a bademon kumpala kua kuluabu bayidi ba Yezu. Kadi pakangatabu dipangadika dia kuenzela Nzambi mudimu, ‘bena majimbu ba bungi bakasangisha mikanda yabu, bakayosha ku mêsu kua bantu bonso.’ (Bienzedi 19:19) Bantu ba mu Efeso aba badi batuleja ne: muntu yonso udi musue kumbuka ku bukokeshi bua bademon udi ne bua kuosha bintu bionso bia bademon. Tuamba ne: mikanda, bibejibeji, bintu bia manaya ne mijiki idi ne malu a bademon, bijimba anyi kuvuala bikanu, mikaba anyi tulamba kampanda bua kudilama.​—Dutelonome 7:25, 26; 1 Kolinto 10:21.

Bidimu bikese panyima pa bena mu Efeso aba bamane kuosha mikanda yabu ya malu a majimbu, mupostolo Paulo wakamba ne: ‘Tudi tuluangana ne bisumbu bia nyuma mibi.’ (Efeso 6:12) Paulo udi wakambila bena Kristo ne: ‘Luatayi bintu bionso bia mvita bia Nzambi, bua nuenu numanye mua kuimana bakandamana kumpala kua mateyi a Diabolo.’ (Efeso 6:11) Mubelu eu utshidi amu ne mushinga. Bena Kristo badi ne bua kuditatshisha bua kuikala ne ditabuja dikole bua kumona mua kukandamena nyuma mibi. Paulo wakamba kabidi ne: ‘Pa mutu pa bintu bionso nuambule ngabu wa ditabuja, unudi mua kuepela nende miketa yonso ya Satana idi ne kapia kasuikilaku.’ (Efeso 6:16) Muntu udi ukolesha ditabuja diende padiye ulonga Bible. (Lomo 10:17; Kolosai 2:6, 7) Nunku, tuetu ne tshibidilu tshia kulonga Bible, tudi tukolesha ditabuja dietu bua kumona mua kukandamena nyuma mibi.​—Musambu 91:4; 1 Yone 5:5.

Kadi bena Kristo ba mu Efeso abu bavua kabidi ne bualu bukuabu bua mushinga buvuabu ne bua kuenza. Paulo wakabambila ne: ‘Nutendelele Nzambi misangu yonso ne kulomba kuonso ne disengelela dionso mu nyuma.’ (Efeso 6:18) Nunku, bantu badi basue bua bademon kababatatshishi lelu’eu, badi ne bua kuikala balomba Yehowa bikole bua abalame. (Nsumuinu 18:10; Matayo 6:13; 1 Yone 5:18, 19) Bible udi utuambila ne: ‘Nudikokeshe kudi Nzambi; kadi nukandamene Diabolo ne yeye neanunyeme.’​—Yakobo 4:7.

Nansha mudi muntu udi bademon batatshisha ne bua kusambila bikole bua kumbuka ku bukokeshi buabu ne kutungunuka ne kuenzela Yehowa mudimu ne muoyo umue, mbimpe bena Kristo bakuabu basambile bua muntu eu. Badi mua kulomba Nzambi bua apeshe muntu eu bukole bua amone mua kupita bademon aba bukole. Tudi bajadike ne: Nzambi neatuteleje patudi tumulomba bua ambuluishe muntu udi uluangana muende muonso bua ‘kukandamena Diabolo,’ bualu Bible udi wamba ne: “Disengelela dia muntu muakane didi ne bukole bua bungi mu kuenza kuadi.”​—Yakobo 5:16.

[Tshimfuanyi mu dibeji 31]

Bena Kristo ba mu Efeso bakosha mikanda yabu ya malu a majimbu