Ditabuja diende didi dikankamija bakuabu

PAKALELABU Silvia mu ngondo wa 12 mu 1992, uvua umueneka muana wa bakaji uvua ne makanda a mubidi mimpe. Kadi pakakumbajaye bidimu bibidi, bakamukuata ne disama dia mucoviscidose didi baminganga kabayi bamanye mua kuondapa, didi dipangisha muntu bua kupuyakana bimpe ne dimusamisha tshifu. Bua disama diende edi, Silvia udi ne bua kunua tumuma tua buanga 36 dituku dionso, kukoka bukuabu mu diulu ne kuenza malu makuabu adi baminganga bamuambila. Bu mudi bisulusulu biende bishale ne bukole bukese menemene bua kukoka lupepe, utu wenda misangu yonso ne kamu ka kukoka naku lupepe.

Teresa mamuende wa Silvia udi wamba ne: “Bidi bitukemesha mudi Silvia mukolele disama edi. Dimanya diende dia mu Bible ndimupeshe ditabuja dikole. Ditabuja edi ke didi dimuambuluishe bua kutantamena ntatu ya disama diende. Utu uvuluka misangu yonso bulongolodi bupiabupia budi Yehowa mulaye muikale bonso badi basama mua kumvua bimpe.” (Buakabuluibua 21:4) Imue misangu patu bena mu dîku diabu bateketa mu mikolo, Silvia utu ubasekesha bua kubakankamija. Wakambila baledi bende ne mukuluende wa balume ne: “Nsombelu utuikala nende mu bulongolodi bupiabupia neatufikishe ku dipua makenga etu onso muoyo.”

Silvia utu uyisha pa tshibidilu ne bakuabu, ne bantu batuye uyukila nabu batu bamumone muikale ne disanka. Bena mu tshisumbu tshia mu bidila bia Canaries tshituye ubuela, batu basanka patuye wandamuna mu bisangilu ne bamumona wenzamu midimu. Kabidi panyima pa tshisangilu tshionso, Silvia utu musue kuanji kushalaku bua kuyukila ne bena Kristo nende. Mushindu utuye usankidila bakuabu mmufikishe bena mu tshisumbu bonso ku dimunanga.

Tatuende Antonio udi wamba ne: “Silvia mmutupeshe dilongesha dia mushinga mukole. Nansha mutudi ne ntatu, muoyo ndipa dia mushinga mukole dia kudi Nzambi, ne tudi ne bua kudinanga bikole.” Amu bu Silvia, basadidi bonso ba Nzambi bansonga ne bakulumpe mbindile ne muoyo kulu kulu dîba dikala ‘muena musoko kayi wamba ne: Ndi ne disama.’​—Yeshaya 33:24.

[Tshimfuanyi mu dibeji 31]

Silvia udi ubala mvese mu Bible padi mamuende mumukuatshile kamu kende ka kukoka naku lupepe