“Kubangila ku lelu, ndi ngitaba ne: Nzambi udiku”

ALEXANDRA mamu mukuabu muena Ukraine, udi musombele mu tshimenga tshia Prague mu République tchèque, uvua upingana kuende ufumina ku mudimu. Muaba kampanda utu bantu bangatshila mashinyi, wakamona kabuta kakese panshi kavua bantu benda badiatakaja. Pakangulaye kabutu aku ne kutangilaye munda muaku, wakamona bualu bua dikema: muvua mukafu wa mfranga wa mabeji a 5 000, 5 000 koruna! Bivua bimueneka ne: kakuvua muntu uvua ukeba kabuta aku to. Bu muvua Alexandra muenyi mu République tchèque, uvua wenza mudimu mukole bua kupeta makuta. Ntshinyi tshivuaye mua kuenza ne mfranga eyi?

Pakapingana Alexandra kumbelu, wakaleja muanende wa bakaji Victoria kabuta aku. Kukebabu mu kabuta bua kumona dîna dia muenaku ne muaba uvuaye musombele, kupangilabu. Kadi mu kabuta amu muvua dibeji ne nimero ya bungi. Luseke lumue lua dibeji luvua lufunda nimero ya tshibutshilu kampanda tshia ku banke, ne lunga luseke luvua ne mikuabu nimero ya bungi. Muvua kabidi dibeji divuabu bafundile banke kampanda wa muaba au ne dikuabu dibeji difunda ne: “koruny 330 000” (anyi dolare ya bena Amerike mitue ku 10 000). Ke bungi menemene bua makuta avua mu kabuta aku.

Alexandra wakateta bua kubikila banke ne tshivuaye mumone bu nimero ya telefone e kupangilaye. Ke yeye ne muanende kuyabu ku banke ne kumvuijabu tshivua tshienzeke. Bobu kuebeja bua nimero ya tshibutshilu ivuabu bapete mu kabuta. Kadi banke kavua ne tshibutshilu tshia nimero ayi to. Dituku diakalonda, Alexandra wakapingana ku banke au ne nimero mikuabu ivua mu kabuta. Eyowa, kuvua mamu kampanda uvua ne tshibutshilu tshia nimero ayi. Alexandra ne Victoria kubikilabu mamu au, ne kuitabaye ne: uvua mujimije makuta. Dituku diakapetanganabu bonso, mamu muena kabuta wakabela tuasakidila wa bungi ne kubebeja ne: “Nnupeshe tshinyi bua nuenu kumpingajila makuta?”

Victoria kuandamuna ne: “Katuena tukulomba tshintu to. Bu tuetu basue kulama makuta au, katuvua mua kuapingaja nansha.” Ke yeye kumvuija mu tshiena-Tchèque tshivuaye kayi mumanye bimpe ne: “Tudi tukupingajila makuta aa bualu tudi Bantemu ba Yehowa. Kondo ketu ka muoyo kalongesha kudi Bible kakena kitaba bua tuetu kulama tshintu tshidi katshiyi tshietu to.” (Ebelu 13:18) Mamu au kuamba ne disanka dionso ne: “Kubangila ku lelu, ndi ngitaba ne: Nzambi udiku.”